Шавкат Мирзиёев раислигида 8 апрель куни Саховат, Мурувват ва Меҳрибонлик уйлари ҳамда махсус мактаб интернатлари фаолияти бўйича видеоселектор йиғилиши бўлиб ўтмоқда, деб хабар берди «Дарё» мухбири.
Президент 2022 йилда барча тиббий-ижтимоий муассасаларни қурилиш-таъмирлаш ва жиҳозлашга 227 миллиард сўм ажратилишини айтган.
«Шу билан бирга, бугунги йиғилишга тайёргарлик кўриш жараёнида, биз барча вилоят, шаҳар ва туманлар ҳокимларига ўз ҳудудидаги ҳар бир тиббий-ижтимоий ташкилотга бориб, у ердаги аҳволни ўз кўзи билан кўриб, муаммоларни аниқлаш ва ҳал этиш чораларини кўриш тўғрисида топшириқ берганмиз. Бугун уларнинг ҳар бири қайси муассасада қандай камчиликларни аниқлагани ва нима чоралар кўргани тўғрисида ҳисобот беради. Афсуски, биздаги бор маълумотлар, жойлардаги қатор тиббий-ижтимоий муассасаларнинг шароитини тубдан яхшилаш зарурлигини кўрсатмоқда», — дейди Шавкат Мирзиёев.
Давлат раҳбарининг маълум қилишича, 36 та Саховат ва Мурувват уйларидан 12 тасида қўшимча бино, 7 тасида ётоқхона, ошхона, тиббиёт бўлими, спорт зали қуриш, 21 тасида бинолар ва иситиш-совитиш тизимини таъмирлашга эҳтиёж мавжуд.
«Шунингдек, 6 та Меҳрибонлик ва 11 та кичик ёшдаги болалар уйларидан 2 таси таъмирга муҳтож аҳволда. Хусусан, Тошкент вилояти, Бўка туманидаги 15-сон Меҳрибонлик уйида канализация тизими таъмирталаб. Андижон вилоятида кичик ёшдаги болалар уйининг бинолари капитал таъмирга муҳтож. Имконияти чекланган болаларга ихтисослашган 86 та мактаб-интернатдан 11 таси капитал таъмирлашни талаб этади. Жами 3 та мактаб-интернатда қўшимча ўқув биноси, 5 тасида ётоқхона, 4 тасида ошхона, 15 тасида фаоллар ва спорт зали қурилишига эҳтиёж бор», — деди президент.
Шавкат Мирзиёев 3 та мактаб-интернатда иситиш тизими, 31 тасида ётоқхона, 10 тасида ошхона, спорт ва фаоллар зали, меҳнат хоналари таъмирталаб эканини айтди.
«Бундан ташқари, 22 та санаторий шаклидаги мактаб-интернатдаги (сколиоз ва нафас йўллари касалликларига ихтисослашган) шарт-шароитларни ҳам ўрганиб, тегишли чоралар кўриш зарур. Мана шу мисоллар, аҳолининг меҳр ва ғамхўрликка муҳтож қатлами учун зарур шарт-шароитларни яратиб бериш борасидаги ишларимиз ҳали қониқарсиз эканини кўрсатиб турибди», — дейди президент.
Давлат раҳбари масъулларга бир ой муддатда барча тиббий-ижтимоий муассасаларнинг аҳволини яна бир бор чуқур ўрганиб, 2022—2024 йилларда уларда қурилиш-таъмирлаш ишларини бажариш ва жиҳозлаш бўйича ҳукумат қарори лойиҳасини тайёрлаш бўйича топшириқ берди.
Изоҳ (0)