MIBning Samarqand viloyati boshqarmasi 2022-yilning o‘tgan davri mobaynida aliment to‘lovchilardan undiruvchilar foydasiga 21 milliard so‘mdan ortiq mablag‘ undirgan. Bu haqda boshqarma boshlig‘i o‘rinbosari Fozil Fayziyev bilan bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri Farhod Norbo‘tayev.
Fozil Fayziyevning aytishicha, aliment undirish harakatlari davomida ko‘pchilik oilalar yarashgan.“2022-yilning o‘tgan davrida profilaktik suhbatlar va chora-tadbirlar natijasida 1961 ta oila yarashtirilgan. 640 nafar ishsiz aliment to‘lovchi ishga joylashtirilib, ularning doimiy bandligi ta’minlangan”, — deydi Fozil Fayziyev.
Qo‘shimcha qilinishicha, 2021-yil davomida 2104 nafar aliment to‘lovchi ota ishga joylashtirilgan bo‘lsa, shu yildagi ijro ishlari davomida olib borilgan profilaktik suhbatlar natijasida 1345 ta yosh oila yarashtirilgan. Shuningdek, o‘sha yili aliment to‘lovlarini to‘lashdan muntazam bo‘yin tovlab kelgan jami 747 nafar qarzdor ma’muriy javobgarlikka, 125 nafari esa jinoiy javobgarlikka tortilgan.
“2022-yilning o‘tgan uch oyida davomida esa 267 nafar qarzdor ma’muriy, 35 nafari esa jinoiy javobgarlikka tortilgan”, — deydi Fozil Fayziyev.
Tadbirda aytilishicha, boshqarmaning Qidiruv sho‘basi tomonidan 2022-yilning o‘tgan davrida 226 nafar qarzdorga nisbatan olib borilgan qidiruv tadbirlari natijasida 154 nafar qarzdor topilgan. Hozirda 72 nafar qarzdorlarni topish yuzasidan qidiruv tadbirlari olib borilmoqda.
Izoh (0)