МИБнинг Самарқанд вилояти бошқармаси 2022 йилнинг ўтган даври мобайнида алимент тўловчилардан ундирувчилар фойдасига 21 миллиард сўмдан ортиқ маблағ ундирган. Бу ҳақда бошқарма бошлиғи ўринбосари Фозил Файзиев билан бўлиб ўтган матбуот анжуманида маълум қилинди, дея хабар берди «Дарё» мухбири Фарҳод Норбўтаев.
Фозил Файзиевнинг айтишича, алимент ундириш ҳаракатлари давомида кўпчилик оилалар ярашган.«2022 йилнинг ўтган даврида профилактик суҳбатлар ва чора-тадбирлар натижасида 1961 та оила яраштирилган. 640 нафар ишсиз алимент тўловчи ишга жойлаштирилиб, уларнинг доимий бандлиги таъминланган», — дейди Фозил Файзиев.
Қўшимча қилинишича, 2021 йил давомида 2104 нафар алимент тўловчи ота ишга жойлаштирилган бўлса, шу йилдаги ижро ишлари давомида олиб борилган профилактик суҳбатлар натижасида 1345 та ёш оила яраштирилган. Шунингдек, ўша йили алимент тўловларини тўлашдан мунтазам бўйин товлаб келган жами 747 нафар қарздор маъмурий жавобгарликка, 125 нафари эса жиноий жавобгарликка тортилган.
«2022 йилнинг ўтган уч ойида давомида эса 267 нафар қарздор маъмурий, 35 нафари эса жиноий жавобгарликка тортилган», — дейди Фозил Файзиев.
Тадбирда айтилишича, бошқарманинг Қидирув шўъбаси томонидан 2022 йилнинг ўтган даврида 226 нафар қарздорга нисбатан олиб борилган қидирув тадбирлари натижасида 154 нафар қарздор топилган. Ҳозирда 72 нафар қарздорларни топиш юзасидан қидирув тадбирлари олиб борилмоқда.
Изоҳ (0)