Buxoro viloyatining Vobkent tumanidagi “Do‘stlik” mahallasida 2500 namozxonga mo‘ljallangan yangi jome masjid foydalanishga topshirildi, deya xabar berdi “Daryo” muxbiri.
Ramazonning ilk kunida ochilgan “Qassoblik” jome masjidi barcha qulayliklarga ega bo‘lgan tahoratxona, ayollar uchun alohida namozxona, imom xatib xonasi, ma’muriy binolar, kutubxona hamda azon aytish uchun mo‘ljallangan minoradan iborat.
“Mazkur masjidga ilgari atigi 50 nafar namozxon sig‘ardi. Shu bois ham bu masjid 15 milliard so‘mga qayta qurildi. Bugungi kunda tumanda masjidlar soni 10 taga yetdi. Mazkur jome masjid foydalanishga topshirilgan kun namozxonlarga 2000 ta Qur’oni Karim hadya etildi. E’tiborlisi, bu masjidga namozxonlar joynamoz bilan kelishmaydi. 2500 namozxonga mo‘ljallangan joynamoz har kuni tong sahardan hozirlab qo‘yiladi”, — deydi tuman bosh imomi G‘olib Ochilov.
Viloyat bosh imomi Jobir Elovning ma’lumot berishicha, jome masjidi ochilishida tarovih namozlari o‘qilib, xatmi Qur’on qilingan.
“Viloyatda bunday katta jome masjidlar 106 tani tashkil etadi. 101 tasida tarovih namozlari o‘qilib, 73 tasida Qur’oni Karim xatmi to‘liq tushirilmoqda. 5 tasida esa ta’mirlash ishlari olib borilyapti. Tez kunda milliy va g‘oyatda go‘zal ko‘rinishdagi bu masjidlar ham foydalanishga topshiriladi”, — deydi Jobir Elov.
Izoh (0)