Italiyaning Tecon kompaniyasi qariyb 300 ming yevrolik yangi loyihani O‘zbekistonda amalga oshirishni maqsad qilgan. Loyiha ishlab chiqarish quvvatlari va korxonalarga xizmat ko‘rsatish markazini o‘z ichiga olgan. “O‘zcharmsanoat” uyushmasida bo‘lib o‘tgan uchrashuvda loyihani amalga oshirishga doir tashkiliy-amaliy masalalar muhokama qilindi.
Ma’lumot uchun, Tecon — 40 yildan buyon poyabzal sanoati uchun texnologiya va butlovchi qismlar yetkazib berish bilan shug‘ullanib keladi. O‘zining faoliyati davomida Tecon Italiyaning milliy brendlaridan biriga aylanishga muvaffaq bo‘lgan.
Uchrashuvda kompaniya menejeri Kamilla Tavitti Teson kompaniyasi rahbari Jorjio Menikoni 8 yil avval O‘zbekistonga tashrif buyurib, mamlakatimizning imkoniyatlari va ishlab chiqarish quvvatlari bilan tanishgani, ulkan salohiyatdan ruhlanganini ta’kidladi.
Kamilla Taviti ta’kidlashicha, O‘zbekistonda investorlar uchun ochiq va liberal pul-kredit siyosati, biznesni har tomonlama qo‘llab-quvvatlash va davlat kafolatlari mavjud. Aynan shu omillar yangi loyihani amalga oshirishga turtki bo‘ldi.
Muloqotda O‘zbekiston charm-poyabzal sanoatining ishlab chiqarish salohiyati, eksport geografiyasiga oid taqdimotlar o‘tkazildi. Italiya kompaniyasi mamlakatimiz hududlaridagi ishlab chiqarish korxonalariga tashrif buyurishdan olgan taassurotlari bilan o‘rtoqlashdi. Ular texnologik jarayonlar va hududlarning salohiyatini yuqori baholadi.
Yaqin kunlarda Italiya kompaniyasi bilan hamkorlik memorandumi imzolanadi. Shundan so‘ng yangi ishlab chiqarish loyihasini amalga oshirish bo‘yicha dastlabki ishlar boshlanadi.
Avvalroq O‘zbekistondagi “Magnit kosmetik”ning birinchi do‘konlari qachon ochilishi ma’lum bo‘lgani haqida xabar berilgan edi.
Izoh (0)