Италиянинг Tecon бренди Ўзбекистонда ўз маҳсулотини ишлаб чиқаради

Италиянинг Tecon компанияси қарийб 300 минг евролик янги лойиҳани Ўзбекистонда амалга оширишни мақсад қилган. Лойиҳа ишлаб чиқариш қувватлари ва корхоналарга хизмат кўрсатиш марказини ўз ичига олган. «Ўзчармсаноат» уюшмасида бўлиб ўтган учрашувда лойиҳани амалга оширишга доир ташкилий-амалий масалалар муҳокама қилинди.

Маълумот учун, Tecon — 40 йилдан буён пойабзал саноати учун технология ва бутловчи қисмлар етказиб бериш билан шуғулланиб келади. Ўзининг фаолияти давомида Tecon Италиянинг миллий брендларидан бирига айланишга муваффақ бўлган. 

Учрашувда компания менежери Камилла Тавитти Тесон компанияси раҳбари Жоржио Меникони 8 йил аввал Ўзбекистонга ташриф буюриб, мамлакатимизнинг имкониятлари ва ишлаб чиқариш қувватлари билан танишгани, улкан салоҳиятдан руҳланганини таъкидлади.

Камилла Тавити таъкидлашича, Ўзбекистонда инвесторлар учун очиқ ва либерал пул-кредит сиёсати, бизнесни ҳар томонлама қўллаб-қувватлаш ва давлат кафолатлари мавжуд. Айнан шу омиллар янги лойиҳани амалга оширишга туртки бўлди.

Мулоқотда Ўзбекистон чарм-пойабзал саноатининг ишлаб чиқариш салоҳияти, экспорт географиясига оид тақдимотлар ўтказилди. Италия компанияси мамлакатимиз ҳудудларидаги ишлаб чиқариш корхоналарига ташриф буюришдан олган таассуротлари билан ўртоқлашди. Улар технологик жараёнлар ва ҳудудларнинг салоҳиятини юқори баҳолади.

Яқин кунларда Италия компанияси билан ҳамкорлик меморандуми имзоланади. Шундан сўнг янги ишлаб чиқариш лойиҳасини амалга ошириш бўйича дастлабки ишлар бошланади.

Аввалроқ Ўзбекистондаги «Магнит косметик»нинг биринчи дўконлари қачон очилиши маълум бўлгани ҳақида хабар берилган эди.