Хоразм вилоятида жойлашган «Янгиариқ» полигонида Ўзбекистон ва Ҳиндистон ҳарбий хизматчилари иштирокида «Дўстлик—2022» қўшма тактик ўқув машғулотлари бўлиб ўтди. Бу ҳақда Мудофаа вазирлиги Ахборот ва оммавий коммуникациялар департаменти хабар берди.
Ўзбек—ҳинд ҳамкорликдаги махсус-тактик ўқувининг асосий кунига қадар биргаликдаги ўқувнинг ғояси, чўл шароитида разведка қидирув ҳаракатларини олиб боришнинг ўзига хос хусусиятлари, шартли душманни қуршаб олиш ва яксон қилишда бўлинмалар бажарадиган вазифаларга ойдинлик киритилган. Ўқув режасига кўра, унинг асосий қисми чегара нарядининг муҳим маълумотларни етказиши билан бошланган. Унда шартли террористик гуруҳлар томонидан давлат чегарасини бузиб ўтилиши ҳамда ғаразли ниятларини амалга оширилиши бўйича ҳаракатлар бажарилган.
Машғулотни Шимоли-ғарбий ҳарбий округ қўшинлари қўмондони полковник Фарҳоджон Шерматов, Ҳиндистон Қуролли Кучлари пиёда қўшинлари бригада генерали Дипак Шарма, Ҳиндистоннинг Ўзбекистондаги ҳарбий атташеси полковник Нипун Ананд ҳамда давлат ва жамоат вакиллари кузатиб борган.
Юзага келган вазиятдан келиб чиқиб, ҳамкорликда оператив штаб ҳамда йиғма отряд ташкил этилиб, ўзбек—ҳинд ҳамкорликдаги кучлари белгиланган ҳудудда жанговар вазифани бажаришга киришган. Ўқув машғулоти давомида разведка-қидирув ишлари олиб борилиши натижасида аҳоли яшаш пунктида ноқонуний қуролланган шахслар ҳаракати аниқланди. Зарба-ишғол бўлинмалари ва уларнинг сони, таркиби ва қўриқлов тизимини аниқлаш мақсадида ҳудудда тун-у кун кузатув олиб борилган.
Шундан сўнг ҳамкорликдаги антитеррор операциясини ўтказишга киришилган. Шартли душманнинг тирик кучлари жанговар гуруҳларнинг ишғол ҳаракатлари натижасида йўқ қилинган.
Учинчи босқичда Ўзбекистон Мудофаа вазирлигининг жанговар вертолётлари жуфтлиги шартли душман ҳаракат қилаётган техника ва тирик кучига ҳаводан зарба берган. Шу билан учинчи бор ўтказилган «Дўстлик—2022» ўзбек—ҳинд қўшма тактик ўқув машғулотлари муваффақиятли якунланган. Ўқувнинг ёпилиш маросимида фаол иштирок этган ҳарбий хизматчилар муносиб тақдирланган.
Аввалроқ Ўзбекистон разведкачилари Покистонда ўтказилган халқаро мусобақада рекорд натижа билан ғолиб бўлгани, Ўзбекистон Қозоғистон билан ҳамкорликда «Термиз» полигонида ҳарбий машғулотлар ўтказгани тўғрисида хабар берилганди.
Изоҳ (0)