Angliya Premyer Ligasi mart oyining eng yaxshilari nomini ma’lum qildi.
“Arsenal” ustozi Mikel Arteta Angliya Premyer Ligasining mart oyidagi eng yaxshi murabbiyi deb topildi. Mutaxassis qo‘l ostida londonliklar 4 o‘yinning 3 tasida g‘alaba qozondi.
Artetadan tashqari eng yaxshi murabbiy bo‘lish uchun Antonio Konte (“Tottenhem”), Yurgen Klopp (“Liverpul”), Brendan Rojers (“Lester”) va Tomas Tuxel (“Chelsi”) kurash olib borgandi.
Eslatib o‘tamiz, dekabr oyining eng yaxshi murabbiyi “shaharliklar” ustozi Pep Gvardiola bo‘lgan edi. Yanvar oyida esa “Vulverhempton” ustozi Brunu Laje ushbu e’tirofga loyiq ko‘rilgandi. Fevralda esa “Nyukasl” bosh murabbiyi Eddi Hau ushbu sovrinni qo‘lga kiritgandi.
“Tottenhem” hujumchisi Harri Keyn esa mart yakunlariga ko‘ra, oyning eng yaxshi futbolchisi deb topildi. 28 yoshli hujumchi mart oyida 4 o‘yinda 4 ta gol va 2 ta golli uzatmaga mualliflik qildi.
Keyn yettinchi marta ushbu sovringa ega chiqmoqda va “Manchester Siti”ning sobiq futbolchisi Serxio Agueroning rekordini takrorladi.
Harridan tashqari ushbu sovrin uchun Metti Kesh (“Aston Villa”), Kay Haverts (“Chelsi”), Trevo Chaloba (“Chelsi”), Deyan Kulusevski (“Tottenhem”), Endryu Robertson (“Liverpul”), Bukayo Saka (“Arsenal”), Ayven Touni (“Brentford”) kabi futbolchilar da’vogar edi.
Dekabr oyida mazkur sovrinni “Manchester Siti” vingeri Rahim Sterling, yanvarda esa “Manchester Yunayted” posboni David de Xea qo‘lga kiritgandi. Fevralda esa “Liverpul” himoyachisi Joel Matip ushbu sovringa loyiq ko‘rilgan edi.
“Manchester Yunayted” hujumchisi Krishtianu Ronalduning “Tottenhem” darvozasiga kiritgan to‘pi mart oyidagi eng chiroyli gol deb topildi.
https://www.instagram.com/p/CbzsJfdoc12/
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)