Devid Bekhemning uyiga o‘g‘ri tushgan. Bu paytda u oilasi bilan birga o‘sha yerda bo‘lgan

Sobiq futbolchi Devid Bekhemning saroyiga o‘g‘ri tushdi.

Hodisa 28-fevral kuni sodir bo‘lgan, biroq bu haqidagi xabarlar endi ma’lum bo‘ldi.

“Manchester Yunayted” va “Real”ning sobiq futbolchisi rafiqasi va o‘n yoshli qizi bilan Londondagi saroyining birinchi qavatida bo‘lib turganida, o‘g‘ri binoga bostirib kirgan. U darvozadan oshib, so‘ngra yuqori qavatdagi yotoqxona derazasidan saroyga kirgan.

Buzg‘unchilikni kechroq uyga qaytgan Bekhemning 17 yoshli o‘g‘li Kruz payqagan. U polda oyna siniqlarini ko‘rgan.

Jinoyatchi sobiq futbolchining uyidan dizaynerlik liboslari, aksessuarlar va elektronika buyumlarini o‘g‘irlab ketgan.  Yo‘qotish bir necha ming funtga baholangan. Taxminlarga ko‘ra, o‘g‘rilikni amalga oshirgan shaxs hududda faoliyat yurituvchi jinoiy to‘dalardan birining a’zosi.

Hozirda politsiya tergov harakatlarini olib bormoqda.

Avvalroq “Atletiko”ga qarshi o‘yin vaqtida Pol Pogbaning uyiga o‘g‘ri tushgandi. Karim Benzemaning uyi to‘nab ketilgani xabar qilingandi. “Liverpul” futbolchisi Fabinyo ham o‘g‘rilik qurboni bo‘lgandi. Talonchilar “Manchester Siti” vingeri Riyod Mahrezni yarim million yevroga chuv tushirgani haqida xabar berilgandi. Dele Alli esa o‘z uyida bosqinchi o‘g‘rilar tomonidan kaltaklangandi.