Англия Премьер Лигаси март ойининг энг яхшилари номини маълум қилди.
«Арсенал» устози Микель Артета Англия Премьер Лигасининг март ойидаги энг яхши мураббийи деб топилди. Мутахассис қўл остида лондонликлар 4 ўйиннинг 3 тасида ғалаба қозонди.
Артетадан ташқари энг яхши мураббий бўлиш учун Антонио Конте («Тоттенҳэм»), Юрген Клопп («Ливерпуль»), Брендан Рожерс («Лестер») ва Томас Тухель («Челси») кураш олиб борганди.
Эслатиб ўтамиз, декабрь ойининг энг яхши мураббийи «шаҳарликлар» устози Пеп Гвардиола бўлган эди. Январь ойида эса «Вулверҳэмптон» устози Бруну Лаже ушбу эътирофга лойиқ кўрилганди. Февралда эса «Ньюкасл» бош мураббийи Эдди Ҳау ушбу совринни қўлга киритганди.
«Тоттенҳэм» ҳужумчиси Ҳарри Кейн эса март якунларига кўра, ойнинг энг яхши футболчиси деб топилди. 28 ёшли ҳужумчи март ойида 4 ўйинда 4 та гол ва 2 та голли узатмага муаллифлик қилди.
Кейн еттинчи марта ушбу совринга эга чиқмоқда ва «Манчестер Сити»нинг собиқ футболчиси Серхио Агуэронинг рекордини такрорлади.
Ҳарридан ташқари ушбу соврин учун Мэтти Кеш («Астон Вилла»), Кай Ҳаверц («Челси»), Трево Чалоба («Челси»), Деян Кулусевски («Тоттенҳэм»), Эндрю Робертсон («Ливерпуль»), Букайо Сака («Арсенал»), Айвен Тоуни («Брентфорд») каби футболчилар даъвогар эди.
Декабрь ойида мазкур совринни «Манчестер Сити» вингери Раҳим Стерлинг, январда эса «Манчестер Юнайтед» посбони Давид де Хеа қўлга киритганди. Февралда эса «Ливерпуль» ҳимоячиси Жоэл Матип ушбу совринга лойиқ кўрилган эди.
«Манчестер Юнайтед» ҳужумчиси Криштиану Роналдунинг «Тоттенҳэм» дарвозасига киритган тўпи март ойидаги энг чиройли гол деб топилди.
https://www.instagram.com/p/CbzsJfdoc12/
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)