Samarqand viloyati Urgut tumanida ijaraga olingan yer maydonini sotib yuborishga uringan shaxs ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Urgut tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbir davomida fuqaro I.A. “Mirza-Pay” irrigatsiya tizimi boshqarmasiga qarashli 0,9 gektar yer maydonini ijaraga olib, ushbu yer maydonini fuqaro X.U.ga firibgarlik yo‘li bilan 60 ming dollarga sotishga kelishgani aniqlangan. U kelishilgan puldan 30 ming dollarni olgan vaqtida ashyoviy dalillar bilan ushlangan.
Shuningdek, departamentning Samarqand viloyat boshqarmasi tomonidan DXXning Urgut shahar bo‘limi bilan o‘tkazilgan tezkor tadbirda “U-A” mashina-traktor parki rahbari A.X. “F.” oilaviy korxonasi rahbari Sh.ga park hududidan 3,6 sotix yer maydoni ajratib berishni va’da qilgani aniqlangan. U buning evaziga 40 million so‘m talab qilib, shundan 30,4 million so‘mni MTP kombaynchisi X. orqali olgan vaqtida ashyoviy dalillar bilan ushlangan.
Farg‘onada o‘tkazilgan tezkor tadbirda esa fuqaro B.Yu. va boshqalar o‘zaro til biriktirib, “Farg‘ona suvta’minot” MCHJ Uchko‘prik tuman bo‘limi balansida bo‘lgan 2 sotix yer maydonini 5 ming dollar evaziga fuqaro J.S.ning nomiga rasmiylashtirib berishni va’da qilgani aniqlangan. Ular kelishilgan pulning 1,5 ming dollarini olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Xorazmda issiqxona qurish uchun bankdan 2 mln dollar kredit ajratib berish evaziga 80 ming dollar olgan shaxslar ushlangani, Buxoro va To‘rtko‘lda yer sotmoqchi bo‘lgan kadastr sobiq mutaxassisi hamda fuqaro qo‘lga olingani, O‘zbekistonning uchta hududida noqonuniy yer olib berish uchun jami 10 ming dollar va 120 mln so‘m olgan shaxslar ushlangani to‘g‘risida xabar berilgandi.
Izoh (0)