Ijtimoiy tarmoqlarda Toshkent viloyati Zangiota tuman hokimi o‘rinbosari J.U. qidiruvga berilgani haqida xabarlar tarqaldi. Bosh prokuratura matbuot xizmati rahbari Hayot Shamsutdinov “Daryo” so‘roviga asosan holat bo‘yicha ma’lumot berdi.

Qayd etilishicha, haqiqatan ham Zangiota tuman hokimiyati mansabdor shaxslari va boshqalarga nisbatan Jinoyat kodeksining 167 va boshqa moddalari bilan qo‘zg‘atilgan jinoyat ishi yuzasidan tergov harakatlari olib borilmoqda. Jinoyat ishi doirasida Zangiota tumani hokimining sobiq o‘rinbosari J.U.ga Jinoyat kodeksining 167 (o‘zlashtirish yoki rastrata yo‘li bilan talon-toroj qilish), 205 (hokimiyat yoki mansab vakolatini suiiste’mol qilish) va 209-moddalari (mansab soxtakorligi) bilan ayblov e’lon qilinib, sirtdan qamoqqa olish ehtiyot chorasi qo‘llanilgan hamda qidiruv e’lon qilingan.

Shuningdek, Mehnat kodeksining 99-moddasiga asosan J.U. 10-yanvardan tuman hokimining sanoatni rivojlantirish kapital qurilish, kommunikatsiya va kommunal xo‘jalik masalalari bo‘yicha o‘rinbosari vazifasini bajaruvchisi lavozimidan ozod etilgan va mehnat shartnomasi bekor qilingan.