Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on 29-mart kuni rasmiy tashrif bilan O‘zbekistonga tashrif buyurdi. Ikki mamlakat yetakchilari ishtirokida oliy darajadagi Strategik hamkorlik kengashining ikkinchi yig‘ilishi yakunlari bo‘yicha qo‘shma bayonot imzolandi. Bundan tashqari, ikki mamlakat hukumatlari, vazirlik va idoralari darajasida ko‘p qirrali O‘zbekiston—Turkiya hamkorligini yanada kengaytirishga qaratilgan 9 ta hujjat imzolangan.

O‘zbekiston Prezidenti huzuridagi Strategik va mintaqalararo tadqiqotlar instituti bo‘lim boshlig‘i Bahrom Sotiboldiyev “Daryo” muxbiri Musulmonbek Ibrohimovga bergan intervyusida ikki mamlakat o‘rtasidagi munosabatlar, strategik sherikchilik va kelgusidagi rejalar haqida fikr bildirdi.

Tadqiqotchi ekspertlar O‘zbekiston va Turkiya o‘rtasidagi strategik hamkorlik darajasi juda ham yuqori natijalar ko‘rsatayotganini aytmoqda. Shavkat Mirziyoyev tomonidan amalga oshirilayotgan keng ko‘lamli islohotlar natijasida o‘zini dunyoga namoyon qilyapti. Mamlakatimizda yaratilayotgan imkoniyatlardan Turkiya ham to‘g‘ri foydalanishga harakat qilyapti. Buni to‘g‘ri tushunish kerak. Sababi O‘zbekiston bilan hamkorlik Turkiyaning investitsiyalari, ilm-fani rivojlanishi uchun ham foyda. Shuningdek, Turkiya bilan O‘zbekiston hududidagi xomashyo resurslarni qayta ishlab, tayyor mahsulotni birgalikda ishlab chiqarib, uni yangi-yangi bozorlarga sotish imkoniyati paydo bo‘lyapti.

Qurilish sektorida ham katta o‘zgarishlar amalga oshirilmoqda. O‘zbekistonda so‘nggi 5 yil ichida olib borilayotgan qurilishlarda, yangi texnologiya va bilimlarni jalb qilishda turkiyalik tadbirkorlarning, katta-katta shirkatlarning bilimlaridan, tajribalaridan, imkoniyatlaridan foydalanyapmiz. O‘zaro manfaatli aloqalarda biz ulardan bilim va ko‘nikmalar, tajribalarni olyapmiz, ular esa o‘zlari uchun yangi bozorlarni kashf qilyapti. Shuningdek, bu aloqalar ikki xalqlar o‘rtasidagi do‘stlik-birodarlik rishtalarini yanada jipslashtirish uchun imkoniyat beradi.

O‘ylaymanki, dunyoning geosiyosiy hamda geoiqtisodiy xaritasi juda katta o‘zgarishlarni boshdan kechiryapti. Bu kabi jiddiy o‘zgarishlar bo‘layotgan bir davrda, xavf va tahdidlarni ko‘payganligi bilan birgalikda, ehtimol, yangi imkoniyatlar eshiklari ochilayotgan bo‘lishi mumkin. Har qanday holatda ham biz imkoniyatlardan to‘g‘ri foydalanishdan rag‘bat topishimizni o‘ylashimiz kerak. Turkiya ham xuddi shunaqa fikrda, deb o‘ylayman. Jaloliddin Rumiyning bir yaxshi gapi bor – “Imkoningdan imkon izla”. Har qanday murakkab holatda ham undan chiqib ketishning yo‘llari bo‘ladi.

O‘zbekiston Prezidenti huzuridagi Strategik va mintaqalararo tadqiqotlar instituti, bo‘lim boshlig‘i Bahrom Sotiboldiyev

Mutaxassis O‘zbekistonning tashqi siyosatidagi asosiy ustuvor yo‘nalishlaridan biri — Markaziy Osiyoni birgalikda harakat qiladigan maydonga aylantirishdan iborat ekanligini ta’kidladi.

“Markaziy Osiyo mamlakatlarining barchasi xomashyo resursiga boy, arzon ishchi kuchiga ega bo‘lgan mamlakatlar hisoblanadi. Texnologiyalarni birgalikda olib kirib, birgalikda bozor yaratib, shu bozorning imkoniyatlaridan raqobat qilmoqchi bo‘lgan mamlakatlarning sa’y-harakatlarini jipslashtirib, bunyodkorlik, yaratuvchilik markazlarini tashkil qilish kerak. Zero bundan hamma foyda topsin, zarar topmasin. Bizning eng asosiy maqsadimiz ham shu. Shundagina birgalikda bu mintaqani barqaror rivojlantirish mintaqasiga aylantiramiz. Prezidentimizning niyatlari xolis. Bu rejalarga biz birlashib, jips bo‘lib, mamlakat rahbariyatining atrofida birlashgan holda harakat qilsak, albatta, erishamiz”, — deydi u.

Bahrom Sotiboldiyev Turkiya bilan aloqalarni yaxshilash juda ko‘p sohalarda namoyon bo‘layotgani haqida aytib, uni misollar bilan izohladi.

“Masalan, investitsiyalar, to‘qimachilik, ta’lim, maorif, yangi sanoat klasterlarini tashkil qilish, xomashyo mahsulotlarini qayta ishlab chiqarish kabi sohalarda namoyon bo‘lmoqda. Yangi ochilayotgan imkoniyatlardan ular ham, biz ham to‘g‘ri foydalanishimiz kerak. Vaqt juda shiddat bilan o‘tyapti, sharoit tez o‘zgaryapti. Lekin shunga qaramasdan biz buni to‘g‘ri baholashimiz, vaziyatdan unumli foydalanishimiz kerak. O‘ylaymanki, ikki mamlakatning intilishlari xolis va ikkala tomon uchun ham foydali bo‘ladi”, — deydi u.

Avvalroq Shavkat Mirziyoyev O‘zbekiston—Turkiya strategik sheriklik kengashining uchinchi yig‘ilishini o‘tkazish uchun Turkiyaga borish rejalashtirilgani haqida xabar berilgan edi.

Turkiya prezidenti Rajab Toyyib Erdo‘g‘onning O‘zbekistonga tashrifi doirasida 29-mart kuni Toshkent viloyatida zamonaviy issiqlik elektr stansiyasini ishga tushirish hamda Sirdaryo viloyatida shunday stansiya qurilishini boshlash marosimi bo‘ldi. Ushbu loyihalar Turkiyaning Cengiz Enerji kompaniyasi tomonidan amalga oshirilmoqda.

Shuningdek, ikki mamlakat hukumatlari, vazirlik va idoralari darajasida ko‘p qirrali O‘zbekiston—Turkiya o‘rtasida imtiyozli savdo to‘g‘risida, mehnat va bandlik, sud ekspertizasi, qurilish kabi sohalarga oid hujjatlar imzolandi.