Самарқанд вилояти Ургут туманида ижарага олинган ер майдонини сотиб юборишга уринган шахс ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Ургут туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбир давомида фуқаро И.А. «Мирза-Пай» ирригация тизими бошқармасига қарашли 0,9 гектар ер майдонини ижарага олиб, ушбу ер майдонини фуқаро Х.У.га фирибгарлик йўли билан 60 минг долларга сотишга келишгани аниқланган. У келишилган пулдан 30 минг долларни олган вақтида ашёвий далиллар билан ушланган.
Шунингдек, департаментнинг Самарқанд вилоят бошқармаси томонидан ДХХнинг Ургут шаҳар бўлими билан ўтказилган тезкор тадбирда «У-А» машина-трактор парки раҳбари А.Х. «Ф.» оилавий корхонаси раҳбари Ш.га парк ҳудудидан 3,6 сотих ер майдони ажратиб беришни ваъда қилгани аниқланган. У бунинг эвазига 40 миллион сўм талаб қилиб, шундан 30,4 миллион сўмни МТП комбайнчиси Х. орқали олган вақтида ашёвий далиллар билан ушланган.
Фарғонада ўтказилган тезкор тадбирда эса фуқаро Б.Ю. ва бошқалар ўзаро тил бириктириб, «Фарғона сувтаъминот» МЧЖ Учкўприк туман бўлими балансида бўлган 2 сотих ер майдонини 5 минг доллар эвазига фуқаро Ж.С.нинг номига расмийлаштириб беришни ваъда қилгани аниқланган. Улар келишилган пулнинг 1,5 минг долларини олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Хоразмда иссиқхона қуриш учун банкдан 2 млн доллар кредит ажратиб бериш эвазига 80 минг доллар олган шахслар ушлангани, Бухоро ва Тўрткўлда ер сотмоқчи бўлган кадастр собиқ мутахассиси ҳамда фуқаро қўлга олингани, Ўзбекистоннинг учта ҳудудида ноқонуний ер олиб бериш учун жами 10 минг доллар ва 120 млн сўм олган шахслар ушлангани тўғрисида хабар берилганди.
Изоҳ (0)