JCh—2022 qur’asi oldidan. Terma jamoalar qaysi savatchalardan joy oladi?

JCh—2022 uchun qur’a tashlash marosimida qaysi jamoalar 1-savatchadan joy olishi ma’lum bo‘ldi.

Portugaliya terma jamoasining pley-off finalida Shimoliy Makedoniya ustidan qozonilgan g‘alabasidan so‘ng 1-savatchadan kimlar joy olishi aniq bo‘ldi. Tarkib quyidagicha bo‘ladi: Qatar (mezbon), Braziliya, Belgiya Fransiya, Argentina, Angliya, Ispaniya, Portugaliya.

Shu tariqa Germaniya, Niderlandiya, Daniya, Shveysariya va Urugvay 2-savatchadan joy oladi. Ushbu savatchadagi qolgan joylarni kimlar egallashi hozircha noaniq. Shimoliy Amerikadagi saralash yakunlangandan so‘ng ma’lum bo‘ladi. Agarda AQSh va Meksika mundialga yo‘llanmani qo‘lga kiritsa, ikkalasi ham ikkinchi savatchadan joy oladi.

3-savatchadan Senegal, Eron, Janubiy Koreya, Marokash, Polsha, Serbiya va Yaponiya joy oladi. Kanada JCh—2022 saralashining so‘nggi o‘yinida Panamani mag‘lub etgan taqdirdagina ushbu savatchadan o‘rin oladi. Agar bunday bo‘lmasa, Tunis 3-savatchaga, Kanada 4-savatchaga joylashadi.

4-savatchadan esa Gana, Kamerun, Saudiya Arabistoni, Ekvador, Yevropa pley-off bosqichi g‘oliblari (Shotlandiya, Ukraina yoki Uels) va qit’alararo pley-offda g‘alaba qozongan terma jamoalar joy oladi.

JCh—2022 guruh bosqichiga qur’a tashlash marosimi 1-aprel, juma kuni bo‘lib o‘tadi.