O‘zbekistonlik ikki nafar bokschi 7-may kuni Las-Vegasda (AQSh) professional ringda o‘zining navbatdagi jangini o‘tkazadi. Bu haqda World of Boxing promouterlik kompaniyasi ma’lum qildi.
Super yengil vazn toifasida harakat qilayotgan Shahram G‘iyosov (12-0, 9 KO) va yengil vazn divizioni vakili Elnur Abduraimov (8-0, 7 KO) may oyining markaziy boks oqshomida ringga chiqadi. Hozircha o‘zbekistonlik bokschilarga kimlar raqib bo‘lishi noma’lum.
Mazkur boks kechasining asosiy jangida super o‘rta vazn toifasi mutlaq chempioni Saul Alvares (57-1-2, 39 KO) rossiyalik yengilmas charm qo‘lqop ustasi Dmitriy Bivolga (19-0, 11 KO) qarshi jang qiladi. Jang yarim og‘ir vazn toifasida o‘tkaziladi.
Professional boksda mag‘lubiyatsiz odimlayotgan G‘iyosov WBA International kamariga egalik qiladi. Shahram WBA reytingida yettinchi, IBF reytingida esa 11-pog‘onani egallab turibdi. U so‘nggi jangini 2021-yilning dekabr oyida Toshkentda o‘tkazib, Kristian Koria ustidan g‘alabaga erishgandi.
Abduraimov ham oxirgi jangini dekabr oyida Toshkentda o‘tgan boks kechasida o‘tkazib, unda filippinlik Jon Geminoni taslim etgan.
Izoh (0)