Afsungar Garri Poter haqidagi kitoblar muallifi, britaniyalik yozuvchi Joan Rouling “bekor qilish madaniyati” haqida uni eslab o‘tgan Rossiya prezidenti Vladimir Putinga javob qaytardi.
“Hozir tinch aholi vakillarini ularning ‘jinoiy’ harakatlari, aniqrog‘i, zo‘ravonlikka javobi uchun o‘ldirayotgan yoki raqiblarini qamoqqa tashlayotgan odam g‘arb madaniyatini tanqid qilmagani ma’qul”, — deya yozgan Rouling Twitter’da.
Shuningdek, yozuvchi ayol tvitiga BBC rasmiy akkauntidagi Aleksey Navalniyning ta’qib qilinayotgani to‘g‘risidagi xabarni biriktirgan.
25-mart kuni Vladimir Putin Rossiya g‘arbning “bekor qilish madaniyati” qurboni bo‘lganini ta’kidlab, “bugun ming yillik davlat va rus xalqiga” tajovuz bo‘layotganini qayd etgandi. Rossiya prezidenti o‘z nutqida ma’lum vaqt avval asarlari butun dunyoda 100 millionlab nusxada sotilgan yozuvchi Joan Roulingning gender erkinligi haqidagi fikri keskin tanqidlarga sabab bo‘lganini eslatgan. (“TASS”da keltirilgan iqtibos).
Rossiya Ukrainada harbiy operatsiyalar boshlaganidan keyin rossiyalik ayrim madaniyat va sport vakillarining xorijdagi konsertlari, musobaqalardagi ishtiroki bekor qilingan. Shuningdek, g‘arb madaniyati xonandalari, musiqa guruhlari va boshqa san’atkorlarning Rossiyadagi konsertlari to‘xtatilgan. Xususan, mamlakatda kitoblari eng ko‘p chop etiladigan xorijlik yozuvchi Stiven King Ukrainadagi urush tufayli Rossiyada yangi asarlarini nashr qilmasligini bildirgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)