Афсунгар Гарри Потер ҳақидаги китоблар муаллифи, британиялик ёзувчи Жоан Роулинг «бекор қилиш маданияти» ҳақида уни эслаб ўтган Россия президенти Владимир Путинга жавоб қайтарди.
«Ҳозир тинч аҳоли вакилларини уларнинг ‘жиноий’ ҳаракатлари, аниқроғи, зўравонликка жавоби учун ўлдираётган ёки рақибларини қамоққа ташлаётган одам ғарб маданиятини танқид қилмагани маъқул», — дея ёзган Роулинг Twitter’да.
Шунингдек, ёзувчи аёл твитига BBC расмий аккаунтидаги Алексей Навальнийнинг таъқиб қилинаётгани тўғрисидаги хабарни бириктирган.
25 март куни Владимир Путин Россия ғарбнинг «бекор қилиш маданияти» қурбони бўлганини таъкидлаб, «бугун минг йиллик давлат ва рус халқига» тажовуз бўлаётганини қайд этганди. Россия президенти ўз нутқида маълум вақт аввал асарлари бутун дунёда 100 миллионлаб нусхада сотилган ёзувчи Жоан Роулингнинг гендер эркинлиги ҳақидаги фикри кескин танқидларга сабаб бўлганини эслатган. («ТАСС»да келтирилган иқтибос).
Россия Украинада ҳарбий операциялар бошлаганидан кейин россиялик айрим маданият ва спорт вакилларининг хориждаги концертлари, мусобақалардаги иштироки бекор қилинган. Шунингдек, ғарб маданияти хонандалари, мусиқа гуруҳлари ва бошқа санъаткорларнинг Россиядаги концертлари тўхтатилган. Хусусан, мамлакатда китоблари энг кўп чоп этиладиган хорижлик ёзувчи Стивен Кинг Украинадаги уруш туфайли Россияда янги асарларини нашр қилмаслигини билдирган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)