O‘zbekiston Mudofaa vazirligi harbiy xizmatchilari kichik serjantlar Abdurasul Tuyg‘unov va Abdumalik Abdurahmonov 2022- yilning 17—24-mart kunlari AQSHning Missisipi shtati, Camp Shelby harbiy o‘quv bazasida bo‘lib o‘tgan “Eng ilg‘or jangchi-2022” musobaqasida ishtirok etdi. Bu haqda Mudofaa vazirligi axborot xizmati xabar qildi.
Xalqaro harbiy hamkorlik aloqalarini mustahkamlash va maxsus bo‘linmalarda xizmat qilish nufuzini oshirish kabi maqsadlarda tashkil etilgan musobaqada o‘zbekistonlik harbiy xizmatchilar AQSH Milliy gvardiyasining Maxsus bo‘linmalari harbiy xizmatchilari bilan kuch sinashdi.
Musobaqa davomida harbiy xizmatchilar yakka tarkibda jismoniy tayyorgarlik sinovlari (6 ta mashqni o‘z ichiga olgan Fitnes test), jismoniy va ruhiy zo‘riqish yo‘lagidan o‘tish, tunda 15 kilometr masofaga mo‘ljal olish, 15 kilo yuk bilan 20 kilometr masofaga marsh yugurish, jangovar va umumiy tayyorgarlik bo‘yicha test sinovlari, insho yozish (harbiy hamkorlik mavzusida 500 tadan kam bo‘lmagan so‘z), artilleriya olovini boshqarish, AQSH namunasidagi o‘qotar qurollarni noto‘liq qismlarga yoyish, yig‘ish va jangovar holatga keltirish, shuningdek, ulardan turli usul va sharoitlarda o‘q otish, kutilmagan (syurpriz) mashqlar kabi shartlarni muvaffaqiyatli bajardi.
Harbiy xizmatchilar musobaqa davomida 10 ta yo‘nalish bo‘yicha 20 dan ortiq shartlarni o‘zida jamlagan sinovlardan muvaffaqiyatli o‘tib, 3 marotaba rekord natija qayd etdi.
“Musobaqada O‘zbekiston Mudofaa vazirligi harbiy xizmatchilari yuqori intellektual salohiyati, jismonan chiniqqani hamda g‘alabaga bo‘lgan ishonchi bilan ishtirokchilar orasida yaqqol ajralib turdi hamda eng yuqori natijalarni ko‘rsatgan holda g‘olib bo‘lishdi”, — deyiladi xabarda.
Mazkur musobaqada o‘zbekistonlik harbiy xizmatchilar 2019 va 2021-yillarda ham muvaffaqiyatli ishtirok etib, g‘olib bo‘lishgan edi.
Izoh (0)