Uzbekistan Airports aksiyadorlik jamiyati Boshqaruvi raisi Ra’no Jo‘rayeva birinchi Toshkent xalqaro investitsiya forumida so‘zga chiqib, tashkil etilayotgan Silk Avia mintaqaviy aviakompaniyasining ayrim tafsilotlarini ma’lum qildi.
“Turizm sohasiga investitsiyalarni jalb qilish ufqlari” mavzusidagi muloqot davomida Ra’no Jo‘rayeva ichki turizmni rivojlantirishga to‘xtalar ekan, 2021-yildan boshlab Silk Avia mintaqaviy aviakompaniyasini tashkil etish ishlari boshlab yuborilgani, mazkur aviakompaniya mamlakat ichida aviaqatnovlarga bo‘lgan talabni qondirishini ta’kidlab o‘tdi.
Dastlabki ma’lumotlarga ko‘ra, O‘zbekiston bo‘ylab 40 ga yaqin yo‘nalish – nafaqat poytaxtdan viloyatlarga, balki viloyatlar o‘rtasida ham yo‘lga qo‘yilishi rejalashtirilgan.
“Bu yerda mintaqaviy aviatashuvlar yo‘q va ularni rivojlantirish kerak. Biz hozirda 40 ga yaqin yo‘nalishni ochmoqchimiz. Bu ichki turizm rivojiga ham katta hissa qo‘shadi.
E’tibor bersam, Samarqand, Buxoro, Xiva kabi sayyohlik yo‘nalishlariga ham insonlar yo chipta yo‘qligi, yoki qimmatligi sabab poyezd, avtobus yoxud taksida borishga majbur. Men ichki yo‘nalishlar bo‘yicha statistik ma’lumotlarni ko‘rib chiqdim – 2021 yilda biz millionga yaqin yo‘lovchiga xizmat ko‘rsatdik. Albatta, talab katta. Aholi mamlakat bo‘ylab harakatlanishda qiyinchiliklarga duch kelmoqda.
Shuning uchun biz ishlarni jadal sur’atlarda olib bormoqdamiz, umid qilamizki, kuzgacha samolyotlarni yetkazib beramiz va ilk parvozlarni amalga oshirishni boshlaymiz”, — dedi Ra’no Jo‘rayeva.
Kompaniya boshqaruv raisi, shuningdek, birinchi bosqichda 70 o‘rinli uchta mintaqaviy samolyot kelishi kutilayotganini ta’kidladi. Uning fikricha, bunday sig‘imga ega samolyotlar mintaqaviy aviatashuvlar uchun maqbuldir. Ra’no Jo‘rayeva, shuningdek, mintaqaviy aviakompaniya bazasi yangi “Samarqand” aeroportida joylashishini ham ma’lum qildi.
Izoh (0)