O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiziga keshbekka ega bo‘lmoqda. Davlat soliq qo‘mitasining ma’lum qilishicha, fevral oyida iste’molchilar tomonidan 27,9 milliard so‘m keshbek yig‘ilgan.
24-mart holatiga ko‘ra, to‘plangan keshbek mablag‘larining 12,1 milliard so‘mi to‘lab berilgan.
Ta’kidlanishicha, sotuvchilar tomonidan 6826 ta xarid cheki bekor qilingani sababli 468,9 million so‘mlik keshbek to‘lanmaydi.
Shuningdek, DSQ qolgan keshbek summalari qachon to‘lanishiga ham oydinlik kiritgan:
- 4,5 milliard so‘mlik keshbek 15 474 ta tadbirkorlik subyekti tomonidan soliq hisobotlari topshirilganidan so‘ng;
- 700 million so‘mlik keshbek 3460 ta tadbirkorlik subyekti tomonidan soliq qarzi to‘langanidan so‘ng;
- 10 milliard so‘mlik keshbek shubhali bo‘lgani sababli o‘rganish natijasidan kelib chiqqan holda to‘lab beriladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
Izoh (0)