Ўзбекистонда 2022 йил 1 январдан харид чекларини «Солиқ» мобил дастури орқали рўйхатдан ўтказган жисмоний шахслар харид суммасидан 1 фоизига кэшбэкка эга бўлмоқда. Давлат солиқ қўмитасининг маълум қилишича, февраль ойида истеъмолчилар томонидан 27,9 миллиард сўм кэшбэк йиғилган.
24 март ҳолатига кўра, тўпланган кэшбэк маблағларининг 12,1 миллиард сўми тўлаб берилган.
Таъкидланишича, сотувчилар томонидан 6826 та харид чеки бекор қилингани сабабли 468,9 миллион сўмлик кэшбэк тўланмайди.
Шунингдек, ДСҚ қолган кэшбэк суммалари қачон тўланишига ҳам ойдинлик киритган:
- 4,5 миллиард сўмлик кэшбэк 15 474 та тадбиркорлик субъекти томонидан солиқ ҳисоботлари топширилганидан сўнг;
- 700 миллион сўмлик кэшбэк 3460 та тадбиркорлик субъекти томонидан солиқ қарзи тўланганидан сўнг;
- 10 миллиард сўмлик кэшбэк шубҳали бўлгани сабабли ўрганиш натижасидан келиб чиққан ҳолда тўлаб берилади.
ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
Изоҳ (0)