“Real” klasikodagi mag‘lubiyatdan so‘ng Erling Holandni sotib olishga jiddiy kirishdi

“Real” 2022-yilning yozida “Borussiya D” hujumchisi Erling Holandni o‘z safiga qo‘shib olishga jiddiy kirishadi.

“Real” prezidenti Florentino Peres “Barselona”dan uchralgan yirik mag‘lubiyatdan (4:0) keyin norvegiyalik futbolchini sotib olish kerak degan qarorga kelgan. Karim Benzemaning yo‘qligi jiddiy muammolarga sabab bo‘layotgani ispaniyalik funksionerni xavotirga solyapti, deya xabar qilmoqda AS.

Fransiyalik forvard “El-Klasiko”ni jarohat sabab o‘tkazib yubordi. Uning o‘rnini boshlang‘ich tarkibda Luka Yovich yoki Mariano Dias egallashi mumkin edi, biroq Karlo Anchelotti bu ikki markaziy hujumchiga ishonch bildirmagan.

Peres “Real” Benzemasiz top-o‘yinlarda qiynalishini tushunib yetdi. Shu sabab madridliklar klubi “Borussiya” hujumchisini o‘z safiga qo‘shib olish ustida jiddiy ishlay boshladi.

Avvalroq Holandga “Manchester Siti” va “Barselona”dan qiziqish borligi, “shaharliklar” uni APLning eng ko‘p maosh oluvchi futbolchisiga aylantirishga tayyorligi xabar qilingandi.

Holand Bundesliga joriy mavsumida 17 ta o‘yin o‘tkazib, 16 ta gol va beshta golli uzatma muallifiga aylandi.