Misrning Qohira shahrida sport gimnastikasi bo‘yicha Jahon kubogi bosqichi bo‘lib o‘tmoqda. Musobaqada O‘zbekiston terma jamoasi a’zolari ham ishtirok etmoqda, deb yozadi Sportni rivojlantirish vazirligi.
Qohiradagi musobaqada jahonning 33 ta davlatidan sportchilar g‘oliblik uchun bahs olib boryapti. Jahon kubogining tayanib sakrash yo‘nalishida final bahslari yakuniga yetdi. Unda sport gimnastikasi afsonasi Oksana Chusovitina muvaffaqiyatli qatnashdi va kumush medalga sazovor bo‘ldi.
Chusovitina 12,95 ball jamg‘arishga muvaffaq bo‘ldi. Bellashuvda sloveniyalik Tiaza Kisselef 13,18 ball bilan g‘alaba qozondi. Kanadalik Lauri Denomi esa 12,85 ball bilan kuchli uchlikni yakunlab berdi.
Avvalroq 46 yoshli Chusovitina Qatar poytaxti Doha shahrida bo‘lib o‘tgan sport gimnastikasi bo‘yicha Jahon kubogining ikkinchi bosqichida oltin medalga ega chiqqandi.
Jahon kubogida Oksana Chusovitinadan tashqari, Ominaxon Xalilova, Dildora Oripova, Rasuljon Abdurahimov, Abdulla Azimov, Habibullo Ergashev, O‘tkirbek Jo‘rayev kabi o‘zbekistonlik sportchilar ham ishtirok etmoqda.
O‘zbek sporti afsonasi bo‘lgan Oksana Chusovitina Olimpiada o‘yinlarida 8 marotaba qatnashgan tarixdagi yagona gimnastikachi hisoblanadi. Shuningdek, u sport gimnastikasi bo‘yicha 3 karra Jahon chempionidir.
Chusovitina Tokio Olimpiadasidan keyin faoliyatini yakunlashini ma’lum qilgandi. Biroq 2021-yilning oktabr oyida katta sportga qaytganini e’lon qildi.
“Osiyo o‘yinlari—2022 ga tayyorgarlikni boshlashga qaror qildim. Faoliyatimni O‘zbekiston uchun birorta ham medal qo‘lga kiritmay turib yakunlay olmayman”, — degandi o‘shanda Chusovitina.
Eslatib o‘tamiz, 2022-yilgi Osiyo o‘yinlari sentabr oyida bo‘lib o‘tadi.
Izoh (0)