Мисрнинг Қоҳира шаҳрида спорт гимнастикаси бўйича Жаҳон кубоги босқичи бўлиб ўтмоқда. Мусобақада Ўзбекистон терма жамоаси аъзолари ҳам иштирок этмоқда, деб ёзади Спортни ривожлантириш вазирлиги.
Қоҳирадаги мусобақада жаҳоннинг 33 та давлатидан спортчилар ғолиблик учун баҳс олиб боряпти. Жаҳон кубогининг таяниб сакраш йўналишида финал баҳслари якунига етди. Унда спорт гимнастикаси афсонаси Оксана Чусовитина муваффақиятли қатнашди ва кумуш медалга сазовор бўлди.
Чусовитина 12,95 балл жамғаришга муваффақ бўлди. Беллашувда словениялик Тиаза Кисселеф 13,18 балл билан ғалаба қозонди. Канадалик Лаури Деноми эса 12,85 балл билан кучли учликни якунлаб берди.
Аввалроқ 46 ёшли Чусовитина Қатар пойтахти Доҳа шаҳрида бўлиб ўтган спорт гимнастикаси бўйича Жаҳон кубогининг иккинчи босқичида олтин медалга эга чиққанди.
Жаҳон кубогида Оксана Чусовитинадан ташқари, Оминахон Халилова, Дилдора Орипова, Расулжон Абдураҳимов, Абдулла Азимов, Ҳабибулло Эргашев, Ўткирбек Жўраев каби ўзбекистонлик спортчилар ҳам иштирок этмоқда.
Ўзбек спорти афсонаси бўлган Оксана Чусовитина Олимпиада ўйинларида 8 маротаба қатнашган тарихдаги ягона гимнастикачи ҳисобланади. Шунингдек, у спорт гимнастикаси бўйича 3 карра Жаҳон чемпионидир.
Чусовитина Токио Олимпиадасидан кейин фаолиятини якунлашини маълум қилганди. Бироқ 2021 йилнинг октябрь ойида катта спортга қайтганини эълон қилди.
«Осиё ўйинлари—2022 га тайёргарликни бошлашга қарор қилдим. Фаолиятимни Ўзбекистон учун бирорта ҳам медал қўлга киритмай туриб якунлай олмайман», — деганди ўшанда Чусовитина.
Эслатиб ўтамиз, 2022 йилги Осиё ўйинлари сентябрь ойида бўлиб ўтади.
Изоҳ (0)