“Barselona”ning mag‘lubiyatsiz seriyasi 11 ta o‘yinga yetdi. Keyingi bahs “Real”ga qarshi

“Barselona” 11 o‘yindan buyon mag‘lubiyatga uchramayapti.

Kataloniya jamoasi Yevropa Ligasi 1/8 finali doirasida “Galatasaroy” ustidan 2:1 hisobida g‘alaba qozondi va chorak final yo‘llanmasini qo‘lga kiritdi. Shu tariqa ispan klubi mag‘lubiyatsiz o‘yinlarini 11 taga yetkazdi. Jamoa so‘nggi bor Ispaniya Kubogi doirasida “Atletik”ka 2:3 hisobida imkoniyatni boy bergandi. Xavi shogirdlari 8 o‘yinda g‘alaba qozondi, 3 ta o‘yinda durang natija qayd etdi.

“Ko‘k-anorranglilar”ning keyingi o‘yini 20-mart, yakshanba kuni “Real”ga qarshi bo‘lib o‘tadi. “Barselona” 51 ochko bilan 3-o‘rinda bormoqda, madridliklar esa 66 ochko bilan musobaqa peshqadami bo‘lib turibdi.

Xavi “Barselona” bosh murabbiyligiga kelganidan so‘ng klub 24 ta o‘yin o‘tkazib, 13 ta g‘alaba, 7 ta durang natija qayd etdi, 4 marotaba mag‘lubiyatga uchradi.