Ўзбекистон ҳудудида Twitter ва TikTok VPN иловаларисиз ишлашни бошлади. Бу ҳақда ижтимоий тармоқ фойдаланувчилари маълум қилди.
Ҳолат бўйича расмий хабарлар ҳозирча берилгани йўқ. Ушбу ижтимоий тармоқлар яна қанча вақт очиқлигича қолиши ҳам аниқ эмас.
Эслатиб ўтамиз, 2021 йил июль ойида Ўзбекистонда TikTok ва Twitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди.
Кейинчалик «Миллий тикланиш» демократик партияси Марказий кенгаши раиси ўринбосари Феруза Муҳаммаджонова TikTok ижтимоий тармоғини бутунлай блоклашни таклиф қилди.
Тошкент шаҳар ҳокими «Тошкент ёшлар форуми — 2020» доирасида бўлиб ўтган матбуот анжуманида «Тиктокерларга тақиқ қўйиш эмас, уларни тўғри йўлга йўналтириш бўйича иш олиб боришимиз кераклиги» ҳақида айтган эди.
«TikTok бир платформа, у ерда турли контент бор. Ҳамма ўзига керакли контент олади. Минг афсуски, тақиқ қўйилган одамлар керакмас контентларга киргани кўриниб турибди. Агар керакли контентларга кирилса, ҳеч қандай платформанинг зарари йўқ, деб ўйлайман. Менинг фикримча, тағин билмадим», — деган эди ҳоким «Тошкент ёшлар форуми – 2021» доирасида бўлиб ўтган матбуот анжуманида.
Бундан ташқари, 2022 йилнинг февраль ойида Ўзбекистонда TikTok’ни бутунлай блоклаш таклиф қилинганди. Бунга Адлия вазири муносабат билдириб, ахборот эркин тарқатилиши тарафдори эканини айтган ва жаҳолатга қарши маърифат билан курашиш кераклигини таъкидлаган.
Изоҳ (0)