Navro‘z bayrami munosabati bilan yo‘lovchilar uchun qo‘shimcha qulayliklar yaratish maqsadida 19—26-mart kunlari Toshkent va Samarqand shaharlararo qo‘shimcha poyezdlar qatnovi amalga oshiriladi. Bu haqda “O‘zbekiston temir yo‘llari” xabar qildi.
Qayd etilishicha, shu kunlari Toshkent—Samarqand—Toshkent yo‘nalishida yuqori tezlikda harakatlanuvchi “Afrosiyob” poyezdlari qo‘yiladi.
Eslatib o‘tamiz, 21—23-mart kunlarida ichki yo‘nalishdagi yo‘lovchi poyezdlar uchun quyidagi tarif qismidan kiritilgan bayram chegirmalar mavjud:
- nafaqaxo‘rlar, nogironlar, 1941—1945-yil urush qatnashchilari va ularga tenglashtirilgan fuqarolarga chiptaning tarif qismidan – 50 foiz;
- oliy o‘quv yurtlarining talabalari, maktab o‘quvchilari, kollej va litsey talabalari, IIV, MV, DXX, DS, DB maxsus ta’lim muassasalari talabalariga chiptaning tarif qismidan – 15 foiz;
- oilaviy bo‘lib poyezdga chiqsa (ikki yoki undan ortiq kishi – eri va rafiqasi, eri yoki rafiqasi va 18 yoshgacha bo‘lgan farzandlari, otasi yoki 18 yoshga to‘lmagan bolasi bo‘lgan ona) (nikoh guvohnomasi va qarindoshlikni belgilovchi hujjatlar nusxasi taqdim etilgan holda) chiptaning tarif qismidan – 15 foiz;
- bir jamoa, guruh bo‘lib poyezdga chiqsa (4 kishidan ortiq - yo‘riqnoma asosida) chiptaning tarif qismidan – 15 foiz;
- “Afrosiyob” tezyurar elektropoyezdlarida barcha toifadagi yo‘lovchilarga chiptaning tarif qismidan - 10 foiz.
Avvalroq Uzbekistan Airways ham Navro‘z bayrami munosabati bilan 19-martdan 23-martgacha amalga oshiriladigan mahalliy aviaqatnovlarning barcha tariflari aviachiptalariga 50 foiz chegirma e’lon qilgandi.
Shuningdek, Mo‘ynoq tumani hokimi Baxtiyar Menglibekov Navro‘z bayrami arafasida Toshkent—Nukus—Mo‘ynoq yo‘nalishida aviaparvoz yo‘lga qo‘yish rejalashtirilganini ma’lum qilgandi.
Izoh (0)