So‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.
Toshkentda Gentra o‘g‘irlagan shaxs YTHga uchradi
2022-yil 8-mart kuni soat 20:30 larda noma’lum shaxs Toshkent shahar Mirzo Ulug‘bek tumani O‘zbekiston ovozi ko‘chasida joylashgan avtomashinalar yuvish shoxobchasiga kelib, shoxobcha kassasida hech kim yo‘qligidan foydalanib, 29 yoshli N.Sh.ga tegishli bo‘lgan Gentra rusumli avtomashinani pult yordamida eshiklarini ochib, mashinani noma’lum tomonga olib qochgani aniqlangan.
Mazkur holat yuzasidan Mirzo Ulug‘bek tuman bo‘yicha IIO FMB huzuridagi Tergov bo‘limi tomonidan noma’lum shaxsga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Olib borilgan tezkor qidiruv tadbirlari davomida noma’lum shaxs olib qochilgan transport vositasini Yakkasaroy tumani Shota Rustaveli va Gavhar ko‘chalari kesishgan chorrahada boshqarib ketayotib, Cobalt rusumli avtomashina bilan to‘qnashuv sodir etgani aniqlanib, voqea joyidan yashirinmoqchi bo‘lganida qoidabuzar ushlangan.
Tergov jarayonida ushbu noma’lum shaxsning shaxsiga aniqlik kiritilganda, u muqaddam sudlangan Toshkent viloyatida yashovchi 24 yoshli P.Sh. ekani ma’lum bo‘lgan. Hozirda P.Sh.ga nisbatan qamoqqa olish tarzidagi ehtiyot chorasi qo‘llanilgan. Tergov davom etmoqda.
Samarqandda yuk avtomobili ag‘darilib ketdi
Qayd etilishicha, 2022-yil 13-mart kuni soat 06:30 larda Samarqand viloyati Oqdaryo tumani hududidan o‘tuvchi M-37 avtomobil yo‘lining 11-kilometrida haydovchi — 1989-yilda tug‘ilgan E.Q. DAF rusumli yuk avtomobilida harakatlanib borayotgan vaqtida boshqaruvni yo‘qotishi oqibatida yo‘lning o‘ng tomoniga ag‘darilgan.
YTH natijasida tan jarohati olganlar yo‘q. Transport vositasiga zarar yetgan.
Holat yuzasidan Oqdaryo tumani IIB YHXB mas’ul xodimlari tomonidan surishtiruv ishlari olib borilmoqda.
Izoh (0)