Andijonda xotinini doimiy ravishda urib, unga jiddiy tan jarohati yetkazgan va uning o‘limiga sabab bo‘lgan erga sud hukmi o‘qildi. Bu haqda “Daryo”ga viloyat sudi axborot xizmati xabar berdi.
Jinoyat ishlari bo‘yicha Jalaquduq tuman sudida bo‘lib o‘tgan sud jarayonida aniqlanishicha, fuqaro X.A. 2020-yilning iyun oyida Buloqboshi tumanida yashovchi Y.K. bilan ikkinchi marta oila qurgan. To‘ydan ko‘p o‘tmay xotin Y.A. ruxsatsiz ota uyiga ketib qoladigan odat chiqargan. Shu sabab er-xotin o‘rtasida kelishmovchilik kelib chiqqan.2021-yilning 19-mart kuni soat 12:30 da X.A. turmush o‘rtog‘i Y.K.ga tushlik tayyorlashni buyurib, ko‘chaga chiqib ketgan. Birozdan so‘ng uyiga qaytgach, xotini yana uyda yo‘qligini ko‘rgan. So‘roqsiz ketib qolgan xotinini qaynopasining uyidan topib, yashash uyiga olib qaytgan.
Oilaviy kelishmovchilik 20-mart kuni ham davom etgan. Shu kuni oqshomda X.A. ayolining uydan chiqib ketayotganini ko‘rib, ko‘chadan qaytarib, uyga olib kirgan va jahl ustida uni siltab, boshiga bir necha marta qo‘li bilan urgan. Zarbalardan o‘zini yo‘qotgan ayolning boshi ketma-ket uyning yog‘och va temirdan yasalgan qismiga tegib, o‘ng ko‘zi ko‘karib qolgan.
“Bu holatni ko‘rib, o‘zimni qo‘lga olib uni uyga kiritib yubordim. Ammo kechasi soat birlarda u o‘rnidan turib, yashirincha tashqariga chiqib ketmoqchi bo‘ldi. Shunda undan qayerga ketayotganini so‘rab, yana qochib ketmasligining oldini olish maqsadida do‘q-po‘pisa qilib, oyoqlariga bir necha marta tepib, joyiga yotqizib qo‘ydim. Ertasiga birga nonushta qildik. Dasturxonni yig‘ib bo‘lgach, u yotoqxonadagi shkaflarni changini artish uchun kirib ketayotganini ko‘rib, ortidan kirdim. Shu payt kutilmaganda ayolim baland ovozda baqirib yubordi. Darhol yoniga borganimda ko‘z qorachiqlarini tepaga qaratib, devorga suyangan holda qotib o‘tirganini ko‘rib, tez yordamga qo‘ng‘iroq qildim. O‘sha kuni shifoxonaga yotqizildi. To‘qqiz kundan keyin shifoxonada vafot etdi. Xotinimning o‘limiga uning yotoqxonada yiqilib tushgan sabab bo‘ldi, deb o‘ylayman. Sababi u bir kun avval urgan tarsakimdan o‘lib qolishi mumkin emas. Agarda o‘limiga sababchi bo‘lgan bo‘lsam, qilgan ishimdan chin ko‘ngildan pushaymonman”, — deydi sudlanuvchi X.A.
Ushbu ishni ko‘rib chiqqan sudya Umarjon Mirzaabdullayev A.X.ni Jinoyat kodeksining 104-moddasi 3-qismining “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lsa) bilan aybli deb topib, unga nisbatan 10 yil muddatga ozodlikdan mahrum qilish jazosi tayinlagan.
Izoh (0)