O‘zbekiston qonunchiligiga amaldorlarga biznes qilish va boshqa haq to‘lanadigan lavozimlarda ishlashini taqiqlovchi normalar kiritilishi mumkin. Bu haqda Korrupsiyaga qarshi kurashish agentligi direktori Akmal Burhonov 10-mart kuni o‘tkazilgan matbuot anjumanida aytib o‘tdi, deya xabar bermoqda “Daryo” muxbiri.
Agentlik rahbarining ta’kidlashicha, qonunchilikka davlat xizmatchilari tadbirkorlik bilan shug‘ullanishi mumkin emasligi, nafaqat tadbirkorlik, balki boshqa haq to‘lanadigan lavozimlarda ishlashini taqiqlovchi normalar kiritilmoqda.
“Manfaatlar to‘qnashuviga jinoiy javobgarlik belgilash masalasi ham qo‘yilgan. Aynan davlat xaridlari sohasida manfaatlar to‘qnashuvi uchun jinoiy javobgarlik belgilash taklifi bildirilgan. Parlament qabul qilib, davlat rahbari imzolagandan keyin qonun kuchga kirsa, bularning barchasi amalga oshadi. Jarayon jamoatchilikka e’lon qilib boriladi”, — dedi agentlik direktori.
Burhonovning qo‘shimcha qilishicha, davlat xaridlarida manfaatlar to‘qnashuviga yo‘l qo‘yilishiga nisbatan keskin jazo choralarini ko‘rish vaqti kelgan.
“Hozirda mansabdorlarni manfaatlar to‘qnashuvi aniqlangan taqdirda davlat xaridi avtomatik tarzda bekor qilinadigan va amaldor o‘sha xaridda boshqa ishtirok eta olmaydigan tizim ustida ishlayapmiz. Bunda ijrochi Moliya vazirligi hisoblanadi”, — dedi u.
Avvalroq Akmal Burhonov Kinematografiya agentligi direktori Firdavs Abduxoliqov ishi bo‘yicha izoh berib, amaldorga qo‘zg‘atilgan ma’muriy javobgarlik davlat mablag‘larini talon-taroj qilishga bog‘liq emasligini aytgandi.
Shuningdek, Korrupsiyaga qarshi kurashish agentligi direktori mansabdorlarning mol-mulklari va yillik daromadlari 2022-yil oxirigacha jamoatchilikka ochiqlanishini ma’lum qilgan.
Izoh (0)