Rossiya Mudofaa vazirligi Ukrainada 180 nafar xorijlik yollanma askar o‘ldirilganini ma’lum qildi. Kiyev bu “haqiqiy Rossiya propagandasi” demoqda

Rossiya Mudofaa vazirligi Lvov viloyatidagi harbiy obyektlarga zarbalarni amalga oshirish oqibatida kamida 180 nafar xorijlik yollanma askar o‘ldirilgani va xorijiy qurollarning katta partiyasi yo‘q qilinganini ma’lum qildi. Bu haqda “Interfaks” xabar berdi.

Rossiya Mudofaa vazirligining rasmiy vakili Igor Konashenkovning so‘zlariga ko‘ra, 13-mart tongida Rossiya qo‘shinlari uzoq masofaga mo‘ljallangan yuqori aniqlikdagi qurol yordamida “Starichi” qishlog‘idagi o‘quv markazlari va “Yavorovskiy” harbiy poligoniga zarba bergan.

Rossiya vazirligining ta’kidlashicha, ushbu harbiy obyektlarda xorijlik yollanma askarlarni tayyorlash punkti va Ukrainaga boshqa mamlakatlardan kelgan harbiy texnika hamda qurollar bazasi joylashgan.

Rossiya Mudofaa vazirligi vakilining qo‘shimcha qilishicha, “Ukraina hududiga kelgan xorijlik yollanma askarlarni yo‘q qilish davom ettiriladi”.

Ukraina mudofaa vazirining maslahatchisi Markiyan Lubkivskiy Rossiya tomonining mazkur bayonotiga munosabat bildirib, 180 nafar xorijlikning halok bo‘lgani to‘g‘risidagi ma’lumot haqiqatga to‘g‘ri kelmasligini aytgan. “Bu haqiqiy Rossiya propagandasi”, — deydi u CNN’ga bergan intervyusida. Uning ta’kidlashicha, “Yavorovskiy” poligonida halok bo‘lganlar orasida xorijliklar yo‘q.

Avvalroq Ukraina prezidenti Vladimir Zelenskiy urush vaqtida 1300 ga yaqin ukrainalik harbiy xizmatchi halok bo‘lganini ma’lum qilgandi.