Buxoro shahrida 11-mart kuni kechki payt hafta davomida muttasil yog‘gan yomg‘ir oqibatida “Talipoch qal’a darvozasi” chap tomonidagi qal’a devorining bir qismi qulab tushgani xabar qilingandi. Qal’a devori va darvozasini ta’mirlash uchun Turizm va ma’daniy meros vazirligi tomonidan 1 milliard so‘m mablag‘ ajratildi, deb xabar bermoqda Buxoro viloyati Madaniy meros boshqarmasi.
Qayd etilishicha, hozirda mas’ul soha mutasaddilari va mutaxassislar tomonidan ushbu obyektning loyiha oldi ishlari olib borilmoqda. Binoning texnik holatini o‘rganish va mazkur obyektni tez fursatda qayta tiklash choralarini ko‘rishga doir amalga oshiralayotgan ishlar bilan yaqindan tanishish maqsadida Madaniy meros agentligi direktori Shaxriyor Nurulloyev Buxoro viloyatiga yetib kelgan.
Avvalroq Qamchiq dovoni va Amirsoy yaqinida yo‘l chetiga tosh-tuproq massasi to‘kilib tushgani xabar qilingandi.
Eslatib o‘tamiz, kuchli yomg‘ir yog‘ishi oqibatida Taxtaqoracha dovonining avtomobil yo‘lida qisman o‘pirilish yuzaga kelgandi. Shu sababli 13-mart kuni soat 16:00 dan dovon yo‘li avtomobillar harakati uchun yopilgan. Keyinchalik dovonda ta’mirlash ishlari olib borilib, transportlar harakati uchun ruxsat berilgan.
Shuningdek, Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan. 12-mart kuni Toshkent shahri Mirzo Ulug‘bek tumanida avtomobillar ustiga daraxt qulab tushgan. Favqulodda vaziyatlar vazirligi fuqarolardan kuchli shamol va yog‘ingarchilik vaqtida avtotransport vositalarini daraxtlar ostida qoldirmaslikni so‘ragan.
Izoh (0)