Бухоро шаҳрида 11 март куни кечки пайт ҳафта давомида муттасил ёғган ёмғир оқибатида «Талипоч қалъа дарвозаси» чап томонидаги қалъа деворининг бир қисми қулаб тушгани хабар қилинганди. Қалъа девори ва дарвозасини таъмирлаш учун Туризм ва маъданий мерос вазирлиги томонидан 1 миллиард сўм маблағ ажратилди, деб хабар бермоқда Бухоро вилояти Маданий мерос бошқармаси.
Қайд этилишича, ҳозирда масъул соҳа мутасаддилари ва мутахассислар томонидан ушбу объектнинг лойиҳа олди ишлари олиб борилмоқда. Бинонинг техник ҳолатини ўрганиш ва мазкур объектни тез фурсатда қайта тиклаш чораларини кўришга доир амалга оширалаётган ишлар билан яқиндан танишиш мақсадида Маданий мерос агентлиги директори Шахриёр Нуруллоев Бухоро вилоятига етиб келган.
Аввалроқ Қамчиқ довони ва Амирсой яқинида йўл четига тош-тупроқ массаси тўкилиб тушгани хабар қилинганди.
Эслатиб ўтамиз, кучли ёмғир ёғиши оқибатида Тахтақорача довонининг автомобиль йўлида қисман ўпирилиш юзага келганди. Шу сабабли 13 март куни соат 16:00 дан довон йўли автомобиллар ҳаракати учун ёпилган. Кейинчалик довонда таъмирлаш ишлари олиб борилиб, транспортлар ҳаракати учун рухсат берилган.
Шунингдек, Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган. 12 март куни Тошкент шаҳри Мирзо Улуғбек туманида автомобиллар устига дарахт қулаб тушган. Фавқулодда вазиятлар вазирлиги фуқаролардан кучли шамол ва ёғингарчилик вақтида автотранспорт воситаларини дарахтлар остида қолдирмасликни сўраган.
Изоҳ (0)