A-373 Toshkent—O‘sh avtoyo‘lining Qamchiq dovoni hududida 15—18-mart kunlari kuchli yog‘ingarchilik kuzatiladi. Bu haqda Favqulodda vaziyatlar vazirligi xabar qildi.
Qayd etilishicha, shu kunlari hududda vaqti-vaqti bilan kuchli yog‘ingarchilik, tuman tushishi kuzatiladi. Ko‘ruvchanlik 50 metrgacha pasayishi, shamol tezligi 20—23 metr/sekundgacha kuchayishi, yo‘llarda qor uyumlari yuzaga kelishi mumkin bo‘ladi.
“Favqulodda vaziyatlar vazirligi haydovchilardan xavfsizlik qoidalariga rioya qilishni so‘rab qoladi”, — deyiladi xabarda.
Avvalroq “O‘zgidromet” hafta davomida (14—20-mart kunlari) kuzatiladigan ob-havo haqida ma’lumot bergandi. Unga ko‘ra, hafta oxirlariga borib yomg‘ir yog‘ib, ayrim joylarda qorga aylanishi mumkin.
Respublika Gidrometeorologiya markazining 15-mart, seshanba kuni uchun ob-havo prognozida tog‘li hududlarda havo o‘zgarib turishi, vaqti-vaqti bilan yog‘ingarchilik (yomg‘ir, qor) kuzatilishi, momaqaldiroq bo‘lishi aytilgandi.
“O‘zgidromet” prognoziga ko‘ra, hafta oxirlariga borib ayrim joylarda yomg‘ir qorga aylanishi mumkin. Vaqti-vaqti bilan yomg‘ir yog‘ishi kuzatiladigan beqaror ob-havo keyingi haftaning birinchi yarmigacha saqlanib turadi. Ayrim viloyatlarda kuchli shamol va momaqaldiroq bo‘lishi mumkin.
Eslatib o‘tamiz, 12-mart kuni Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan. Shuningdek, Taxtaqoracha dovonida 13-mart kuni kuchli yomg‘ir yog‘ishi oqibatida M-39 avtomobil yo‘lining 1138–1141-kilometrida qisman o‘pirilish yuzaga kelib, transport vositalarining harakati vaqtincha cheklangan.
Izoh (0)