13-martga o‘tar kechasi Iroq shimolidagi Erbil shahrida joylashgan AQShning bosh konsulxonasi yaqiniga bir nechta raketa kelib tushdi. Iroq Milliy axborot agentligi ma’lumotlariga ko‘ra, shaharda kamida uchta portlash ovozi eshitilgan.
Ma’lum bo‘lishicha, yaqin atrofdagi Kurdiston 24 telekanali binosi shikastlangan, shuningdek, mahalliy aeroportning ishi to‘xtatilgan.
Halok bo‘lganlar va jarohatlanganlar haqida ma’lumotlar yo‘q. Voqea yuzasidan mahalliy hokimiyat surishtiruv ishlarini boshlagan.
Tasdiqlanmagan ma’lumotlarga ko‘ra, raketalar Eron hududidan uchirilgan bo‘lishi mumkin.
Voqea munosabati bilan Amerikaning Bag‘doddagi elchixonasi o‘z xavfsizligini kuchaytirdi va diplomatik vakolatxona hududini butunlay yopib qo‘ydi.
Izoh (0)