Qirg‘iziston va Tojikiston delegatsiyalari o‘rtasidagi muzokaralar natijasida ikki davlat harbiy xizmatchilariga qurol ishlatish taqiqlandi, faqatgina tomonlarning qonun hujjatlari talablarida nazarda tutilgan hollarda o‘t ochish bundan mustasno. Bu haqda Qirg‘iziston Milliy xavfsizlik davlat qo‘mitasi Chegara xizmatining axborot va kommunikatsiyalar boshqarmasi ma’lum qildi, deb yozadi “24.kg”.
Muzokaralar 12-mart kuni “Guliston avtomobil yo‘li” nazorat-o‘tkazish punktida bo‘lib o‘tdi.
Xabar qilinishicha, tomonlar chegara xavfsizligini ta’minlash bo‘yicha turli masalalarni ko‘rib chiqqan, ammo birgalikda qo‘riqlanadigan chegara hududida noxush hodisalar sonining ko‘payishiga alohida e’tibor qaratgan. Ikki davlat chegara vakillari chegaraning muvofiqlashtirilmagan uchastkalari bilan bog‘liq muammolarni qayd etgan.
Uchrashuv yakunlari bo‘yicha quyidagi kelishuvlarga erishildi:
- ikki davlatning chegaradosh hududlarida noxush hodisalarning oldini olishga qaratilgan o‘zaro hamkorlik va sa’y-harakatlarni muvofiqlashtirish bo‘yicha hukumatlararo kelishuv hamda protokollarni amalga oshirish bo‘yicha qat’iy choralar ko‘rish zarur;
- ikki respublikaning chegara vakillari harbiy xizmatchilar o‘rtasida chegarada ko‘ngilsiz voqealar sodir bo‘lgan taqdirda provokatsiyalarga berilmaslik, chegaradagi vaziyatning keskinlashuviga hissa qo‘shayotgan shaxslarning buzg‘unchi harakatlariga qat’iy chek qo‘yish shartligini ta’kidlagan holda tushuntirish ishlarini olib borishi kerak;
- ziddiyatli vaziyatlarni oldindan ko‘ra bilish va oldini olish uchun tomonlarning chegara vakillari doimiy ravishda mavjud vaziyat to‘g‘risida ma’lumot almashishi kerak;
- ikki davlat harbiy xizmatchilariga qurol ishlatish taqiqlanadi, har ikki tomon qonun hujjatlari talablarida nazarda tutilgan hollar bundan mustasno;
- qirg‘iz-tojik chegarasidagi barcha harbiy xizmatchilar chegara qo‘shinlarining o‘zini tutish talablariga qat’iy rioya qilishi shart.
Tojikiston tomonining ma’lum qilishicha, muzokaralar 7 soatdan ortiq davom etgan, deb yozadi “RIA Novosti”. Agentlik suhbatdoshining aytishicha, kelishuvlar natijalariga ko‘ra, 10-mart kuni tojik chegarachisining o‘limiga sabab bo‘lgan qurolli hodisa yuzasidan har bir davlat alohida tergov olib boradi.
Eslatib o‘tamiz, 10-mart kuni ertalab qirg‘iz-tojik chegarachilari o‘rtasidagi otishma sodir bo‘lgandi. Hodisa oqibatida Tojikiston tomonidan bir nafar chegarachi halok bo‘lgan, yana ikki nafari yaralangan. O‘sha sutkada ikki davlat chegarachilari o‘rtasida yana otishma sodir bo‘lgani xabar qilindi.
Tojikiston va Qirg‘iziston o‘rtasidagi bu kabi nizolar 1990-yillardan buyon kuzatiladi, ikki davlat o‘rtasida 950 kilometr chegara hududi belgilab olinmagan va unda ikki tomon kelisha olmayotgan bahsli joylar juda ko‘p. Chegarani demarkatsiya va delimitatsiya qilish yuzasidan muzokaralar 2002-yilda boshlangan va shu kunga qadar ikki yuzdan ziyod komissiya yig‘ilishlari o‘tkazilib, ishchi guruhlar tuzilgan. Ayni vaqtda delimitatsiya va demarkatsiya qilish bo‘yicha chegaraning 550 kilometrga yaqin liniyasi tartibga solinishi boshlangan. Biroq ikki mamlakat o‘rtasida vaqti-vaqti bilan goh aholi, goh chegarachilar o‘rtasida nizolar, otishmalar sodir bo‘lishi to‘xtagani yo‘q.
Izoh (0)