O‘zbekiston Mudofaa vazirligi terma jamoasi Pokistonda 1-martidan boshlangan V Xalqaro “Jamoa ruhi” musobaqasida ishtirok etib, birinchi o‘rinni qo‘lga kiritdi. Bu haqda vazirlik matbuot xizmati “Daryo”ga ma’lum qildi.
Ma’lum qilinishicha, musobaqa Pokiston Qurolli Kuchlariga qarashli 22-armiya korpusi Terrorizmga qarshi kurashish milliy o‘quv markazi (Pabbi shahri) bazasida o‘tkazilgan. Unda 9 ta davlatdan — Marokash, Iordaniya, Keniya, Saudiya Arabistoni, Turkiya, Shri-Lanka, Nepal, O‘zbekiston, shuningdek Pokistondan 8 ta razvedka guruhi, jami 16 ta razvedka jamoalari o‘zaro bellashgan.
Musobaqa jarayonini Tojikiston, Qozog‘iston, Bahrayn va Xitoy davlatlarining Qurolli Kuchlar vakillari kuzatib borgan.
Musobaqa shartlariga ko‘ra, jamoalar 80 kilometrgacha bo‘lgan marshrutning 6 ta nazorat nuqtasida azimut bo‘yicha harakatlanib, nazorat nuqtalarida taktik-maxsus, otish, tibbiy, aloqa, muhandislik tayyorgarligi, ommaviy qirg‘in qurollardan himoya va harbiy topografiyadan turli maxsus mashqlarni, shuningdek, kutilmagan testlarni yechish mashqini bajargan.
“O‘zbekiston Mudofaa vazirligi terma jamoasi qur’aga binoan birinchi nazorat nuqtasidan 10-bo‘lib harakatlanishni boshlagan bo‘lsa-da, ushbu musobaqaning uchinchi nazorat nuqtasida qolgan jamoalardan 6 soat oldin yetib borgan va eng yuqori (2 850) ballni qo‘lga kiritdi”, — deyiladi xabarda.
Musobaqa yakunida, Pokiston quruqlikdagi qo‘shinlar qo‘mondoni general-mayor Adnan O‘zbekiston harbiy xizmatchilarining jismoniy va professional tayyorgarligini alohida ta’kidlab, “Men O‘zbekiston jamoasi kuchli ekanligini bilardim va 1-o‘rinni egallashiga shubham yo‘q edi”, deya jamoa guruhining harakatlari turli ekstremal sharoitlardagi nostandart qaror qabul qilish kabi harakatlarini yuqori baholagan
Musobaqa yakuni bo‘yicha:- 1-o‘rin – O‘zbekiston jamoasi (2 850 ball);
- 2-o‘rin – Marokash jamoasi (1 860 ball);
- 3-o‘rin – Shri-Lanka (2 010 ball) va Saudiya Arabistoni (1 900 ball).
Xalqaro musobaqaning yopilishiga bag‘ishlangan tantanali marosimda g‘olib jamoa va sovrindorlar, shu jumladan, O‘zbekiston jamoasi oltin medal bilan taqdirlangan.
Eslatib o‘tamiz, 2017-yili O‘zbekiston razvedkachilari “Kembriya patruli” musobaqasida 2-o‘rinni, 2018- va 2019-yillarda birinchi o‘rinlarni, 2021-yilda esa 2-o‘rinni qo‘lga kiritgan edi.