Навоий, Жиззах ва Андижон вилояти ҳокимликлари 2021 йилда энг кўп манфаатлар тўқнашувига йўл қўйган. Бу ҳақда Коррупцияга қарши курашиш агентлиги директори Акмал Бурҳонов 10 март куни бўлиб ўтган матбуот анжуманида айтиб ўтди, дея хабар бермоқда «Дарё» мухбири.
Акмал Бурҳоновнинг маълум қилишича, ўтган йил давомида республика бўйича давлат харидларини амалга оширишда 200 га яқин манфаатлар тўқнашувига йўл қўйилгани аниқланган.
«Шундан 100 дан ортиғи бевосита манфаатлар тўқнашуви, амалдор давлат харидида ўзи иштирок этиши мумкин бўлмаса-да, бунга йўл қўйган. 73 та ҳолатда афилланганлик ҳолати аниқланган. Давлат харидлари соҳасида энг кўп манфаатлар тўқнашувига йўл қўйган ҳудудлар – Навоий, Жиззах ва Андижон вилоятлари ҳокимликлари бўлган. Шунингдек, Молия вазирлиги ва бошқа бир қанча ташкилотлар ҳам манфаатлар тўқнашувига йўл қўйган. Биз барча аниқланган қонун бузилиш ҳолатлари бўйича тегишли давлат идораларига 2021 йилда 373 та тақдимнома киритдик ва уларнинг барчаси бекор қилинди», — деди агентлик раҳбари.
Таъкидланишича, манфаатлар тўқнашувига йўл қўйгани учун 24 нафар амалдор маъмурий жавобгарликка тортилган.
«Кинематография агентлигининг мансабдор шахслари манфаатлар тўқнашувига йўл қўйилгани бўйича маъмурий жавобгарликка тортилганди. Бу муҳокамаларга сабаб бўлиб, жамоатчиликка томонидан мансабдорга биринчи марта чора кўрилди, дейилди. Аммо ундай эмас. Шу пайтга қадар 24 нафар мансабдорга манфаатлар тўқнашувига йўл қўйгани бўйича прокуратура идоралари томонидан маъмурий ишлар қўзғатилган ва суд томонидан жавобгарликка тортилган», — деди агентлик директори.
Аввалроқ Акмал Бурҳонов Кинематография агентлиги директори Фирдавс Абдухолиқов иши бўйича изоҳ бериб, амалдорга қўзғатилган маъмурий жавобгарлик давлат маблағларини талон-тарож қилишга боғлиқ эмаслигини айтганди. Шунингдек, Коррупцияга қарши курашиш агентлиги директори мансабдорларнинг мол-мулклари ва йиллик даромадлари 2022 йил охиригача жамоатчиликка очиқланишини маълум қилинган.
Изоҳ (0)