Endi blogerlar YouTube Premium, Music Premium obunalari, homiylik, super chat, super stikerlar va mahsulotlardan daromad ololmaydi.
Qayd etilishicha, bu faqat rossiyalik foydalanuvchilarga tegishli. Blogerlar Rossiyadan tashqarida bo‘lgan foydalanuvchilardan daromad olishda davom etadi. Rossiyadagi kontent mualliflari monetizatsiyani to‘liq o‘chirib qo‘yish haqida bildirishnoma olgan.
4-mart kuni Google YouTube’ga ham ta’sir ko‘rsatgan voqealar tufayli Rossiyada reklama sotishni to‘xtatgan edi. Bu esa shu kungacha kontent yaratuvchilar uchun asosiy daromad manbai bo‘lgan. Shundan so‘ng blogerlar kanallarni qo‘llab-quvvatlash maqsadida tomoshabinlardan VPN xizmatlaridan foydalangan holda video tomosha qilishni so‘ray boshladi.
Reklama sotishni to‘xtatish to‘g‘risidagi qaror Roskomnadzorning talablari bilan bog‘liqligi aytilmoqda. Regulyator Google’dan YouTube’da Ukrainadagi “harbiy operatsiya” haqida “dezinformatsiya”ga ega yolg‘on reklama xabarlarini tarqatishni to‘xtatishni talab qilgan.
28-fevral kuni Roskomnadzor Google Ads’da Ukrainadagi “ko‘plab qurbonlar” haqidagi reklama saytlarini bloklash bilan tahdid qilgan va Google’dan bunday reklamalarni cheklashni talab qilgan edi.
Avvalroq Rossiyada Facebook, Twitter, BBC va qator OAVlar qisman bloklangani haqida xabar berilgan edi. “Roskomnadzor” buni Ukrainadagi harbiy operatsiya to‘g‘risida yolg‘on ma’lumotlar tarqalayotgani bilan izohlagan.
Izoh (0)