Энди блогерлар YouTube Premium, Music Premium обуналари, ҳомийлик, супер чат, супер стикерлар ва маҳсулотлардан даромад ололмайди.
Қайд этилишича, бу фақат россиялик фойдаланувчиларга тегишли. Блогерлар Россиядан ташқарида бўлган фойдаланувчилардан даромад олишда давом этади. Россиядаги контент муаллифлари монетизацияни тўлиқ ўчириб қўйиш ҳақида билдиришнома олган.
4 март куни Google YouTube’га ҳам таъсир кўрсатган воқеалар туфайли Россияда реклама сотишни тўхтатган эди. Бу эса шу кунгача контент яратувчилар учун асосий даромад манбаи бўлган. Шундан сўнг блогерлар каналларни қўллаб-қувватлаш мақсадида томошабинлардан VPN хизматларидан фойдаланган ҳолда видео томоша қилишни сўрай бошлади.
Реклама сотишни тўхтатиш тўғрисидаги қарор Роскомнадзорнинг талаблари билан боғлиқлиги айтилмоқда. Регулятор Google’дан YouTube’да Украинадаги «ҳарбий операция» ҳақида «дезинформация»га эга ёлғон реклама хабарларини тарқатишни тўхтатишни талаб қилган.
28 февраль куни Роскомнадзор Google Ads’да Украинадаги «кўплаб қурбонлар» ҳақидаги реклама сайтларини блоклаш билан таҳдид қилган ва Google’дан бундай рекламаларни чеклашни талаб қилган эди.
Аввалроқ Россияда Facebook, Twitter, BBC ва қатор ОАВлар қисман блоклангани ҳақида хабар берилган эди. «Роскомнадзор» буни Украинадаги ҳарбий операция тўғрисида ёлғон маълумотлар тарқалаётгани билан изоҳлаган.
Изоҳ (0)