Rasman: APL Rossiyada o‘yinlar translyatsiyasi to‘xtatilganini e’lon qildi

Angliya Premyer Ligasi Rossiyada o‘yinlar translyatsiyasi to‘xtatilganini e’lon qildi.

Premyer Liga va klublar bir ovozdan Okko xizmati bilan shartnomani bekor qilishga kelishib olgani tashkilot rasmiy saytida ma’lum qilindi.

Bundan tashqari, Premyer Liga Ukraina xalqini qo‘llab-quvvatlash uchun bir million funt sterling xayriya qilishini ma’lum qildi.

Avvalroq Rossiya bozoridan chekinish tufayli daromad pasayishiga qaramay, barcha ingliz klublari Premyer Liga va EFL’ning ushbu qarorini qo‘llab-quvvatlagani haqida xabar berilgandi. Premyer Liga Rossiyada chempionat o‘yinlarini translyatsiya qilishdan yiliga 6 million funt sterlingga yaqin daromad olgan.

Ma’lumot uchun, hozirgacha Okko platformasi Rossiyada APL o‘yinlarini namoyish etayotgandi. “Match-TV” kanali esa Angliya Kubogi bahslarini translyatsiya qilardi.

Bungacha Xalqaro boks assotsiatsiyasi (IBA) rossiyalik va belarusliklar bokschilarga xalqaro musobaqalarda qatnashishni taqiqlagandi, Butunjahon boks tashkiloti (WBO), Xalqaro boks federatsiyasi (IBF), Butunjahon boks kengashi (WBC), Butunjahon boks assotsiatsiyasi (WBA) Ukrainadagi vaziyat tufayli Rossiyadagi janglarni tan olmasligini ma’lum qilgandi. FIFA Rossiya futbol terma jamoasini JCh—2022 o‘tish o‘yinlaridan, UEFA esa rus klublarini Yevrokuboklardan chetlatgan edi.