Англия Премьер Лигаси Россияда ўйинлар трансляцияси тўхтатилганини эълон қилди.
Премьер Лига ва клублар бир овоздан Okko хизмати билан шартномани бекор қилишга келишиб олгани ташкилот расмий сайтида маълум қилинди.
Бундан ташқари, Премьер Лига Украина халқини қўллаб-қувватлаш учун бир миллион фунт стерлинг хайрия қилишини маълум қилди.
Аввалроқ Россия бозоридан чекиниш туфайли даромад пасайишига қарамай, барча инглиз клублари Премьер Лига ва EFL’нинг ушбу қарорини қўллаб-қувватлагани ҳақида хабар берилганди. Премьер Лига Россияда чемпионат ўйинларини трансляция қилишдан йилига 6 миллион фунт стерлингга яқин даромад олган.
Маълумот учун, ҳозиргача Okko платформаси Россияда АПЛ ўйинларини намойиш этаётганди. «Матч-ТВ» канали эса Англия Кубоги баҳсларини трансляция қиларди.
Бунгача Халқаро бокс ассоциацияси (ИБА) россиялик ва беларусликлар боксчиларга халқаро мусобақаларда қатнашишни тақиқлаганди, Бутунжаҳон бокс ташкилоти (WBO), Халқаро бокс федерацияси (IBF), Бутунжаҳон бокс кенгаши (WBC), Бутунжаҳон бокс ассоциацияси (WBA) Украинадаги вазият туфайли Россиядаги жангларни тан олмаслигини маълум қилганди. ФИФА Россия футбол терма жамоасини ЖЧ—2022 ўтиш ўйинларидан, УЕФА эса рус клубларини Еврокубоклардан четлатган эди.
Изоҳ (0)