Rossiyada APL va Angliya Kubogi o‘yinlari translyatsiyasi to‘xtatilishi mumkin. Ingliz klublari buni qo‘llab-quvvatlagan

Angliya Premyer Ligasi translyatsiyalarini Rossiyada to‘xtatish qaroriga ingliz klublari e’tiroz bildirmaydi, deya xabar qilmoqda Sky Sports.

Premyer Liga va Angliya Futbol Ligasi (EFL) vakillari tez orada musobaqalarni Rossiyada translyatsiya qilinishini to‘xtatishi aytilmoqda.

APL va EFL rahbarlari advokatlarga Rossiya Federatsiyasi hududida translyatsiya bo‘yicha shartnomalarni bekor qilish jarayonini boshlash haqida ko‘rsatma bergan.

Premyer Liga Rossiyada chempionat o‘yinlarini translyatsiya qilish orqali yiliga 6 million funtga yaqin daromad qiladi.

Rossiya bozoridan chekinish tufayli daromad pasayishiga qaramay, barcha ingliz klublari Premyer Liga va EFL’ning ushbu qarorini qo‘llab-quvvatlagan.

Hozirda Okko platformasi Rossiyada APL o‘yinlarini namoyish etadi. “Match-TV” kanali esa Angliya Kubogi bahslarini translyatsiya qiladi.

Avvalroq Xalqaro boks assotsiatsiyasi (IBA) rossiyalik va belarusliklar bokschilarga xalqaro musobaqalarda qatnashishni taqiqlagandi, Butunjahon boks tashkiloti (WBO), Xalqaro boks federatsiyasi (IBF), Butunjahon boks kengashi (WBC), Butunjahon boks assotsiatsiyasi (WBA) Ukrainadagi vaziyat tufayli Rossiyadagi janglarni tan olmasligini ma’lum qilgandi. FIFA Rossiya futbol terma jamoasini JCh—2022 o‘tish o‘yinlaridan, UEFA esa rus klublarini Yevrokuboklardan chetlatgan edi.