Ukrainaning g‘arbidagi Chernovsi shahri Mila Kunisning tug‘ilib o‘sgan vatanidir. Shu sababli u yerda harbiy nizolar boshlanganida Gollivud yulduzi Mila va uning turmush o‘rtog‘i Eshton Katcher vaziyatga birinchilardan bo‘lib munosabat bildirdi. Albatta, so‘zdagina emas, balki amalda ham.
Mila va Eshton ukrainaliklar uchun 30 million dollarlik yordam yig‘ish maqsadida Airbnb va FlexPort.org’ni ulash orqali GoFundMe kampaniyasini ishga tushirdi. Yulduzli juftlik insonparvarlik yordami o‘z vaqtida va kerakli joyga yetkazilishi uchun barcha hisob-kitob masalalarini ham o‘z zimmasiga oldi.
“Ukrainaliklar juda jasur va kuchli xalq. Ammo bu ularning yordamga muhtoj emasligini anglatmaydi. Iltimos, Ukraina xalqi uchun yordam puli yig‘ishda ko‘mak bering”, — deydi Mila Kunis e’lon qilingan videoda.
Mashhurlarning o‘zlari xayriyaga 3 million dollar qo‘shishga va’da berdi.
Eslatib o‘tamiz, Gollivud yulduzlari Rayan Reynolds va Bleyk Layvli ukrainalik qochoqlar uchun million dollar xayriya qildi. Shuningdek, jahonga mashhur aktrisa Anjelina Joli ham Ukrainadagi vaziyatga munosabat bildirib, tinch aholiga yordam berishini ma’lum qilgandi. Aktrisa uzoq vaqtdan beri BMTning yaxshi niyat elchisi sifatida butun dunyo bo‘ylab qochqinlarni qo‘llab-quvvatlab keladi.
Izoh (0)