O‘zbek san’at sohasida kasbdosh qaynota-kuyovlar, qaynona-kelinlar, bojalar, qisqasi, quda-andalar ko‘pchilikni tashkil etadi. “Daryo” hamkasbining qiziga uylangan taniqli san’atkorlarni bir sahifaga jamladi.
Yodgor Sa’diyev
O‘zbekiston xalq artisti Yodgor Sa’diyev ustozi, xalq artisti Amin Turdiyevning Zaylixon ismli qiziga uylangan. 2015-yilda vafot etgan Zaylixon Sa’diyeva san’atshunos olima sifatida O‘zbekiston davlat san’at va madaniyat institutida faoliyat yuritgan. Juftlikdan ikki farzand: Habibulla va Munisxon dunyoga kelgan.
76 yoshli Yodgor Sa’diyev bir nechta nabiralarining bobosi. U bugungi kunda o‘zbek milliy akademik drama teatriga rahbarlik qilmoqda.
Valijon Shamsiyev
So‘z ustasi va aktyor Valijon Shamsiyev O‘zbekiston xalq artisti Erkin Komilovning qizi Dilfuzaxonga uylangan. Ularning olti nafar farzandi bo‘lib, qizlari Layli ham san’at yo‘lini tanladi. U ayni paytda Layli va Majnun juftligida xonanda sifatida ijod qilyapti.
Fathulla Mas’udov
O‘zbekistonda xizmat ko‘rsatgan artist, marhum ijodkor Fathulla Mas’udov ustoz san’atkorlar Gulchehra va Lutfulla Sa’dullayevning Gulira’no ismli qiziga uylangan. Juftlikdan uch farzand tug‘ilgan.
Qizlari Gulnoza tibbiyot sohasida faoliyat yuritadi. To‘ng‘ich o‘g‘illari Ulug‘bek (Habibulloh) bir necha yildan buyon kichik tadbirkorlik bilan shug‘ullanadi. Abdulloh esa O‘zbek Milliy akademik drama teatri aktyori sifatida ijod qiladi.
Yigitali Mamajonov
Aktyor Yigitali Mamajonov ham Sa’dullayevlar xonadoniga kuyov bo‘lgan. U 2018-yilda aktrisa Muqaddas Sa’dullayeva bilan oila qurgan.
Bu Yigitalining uchinchi, Muqaddasning ikkinchi turmushi bo‘lib, ular hozirda uch farzandni tarbiyalamoqda.
Rixsitilla Abdullayev
Taniqli teatr va kino aktyor, boshlovchi Rixsitilla Abdullayev ham o‘z hamkasbining kuyovi hisoblanadi. U 2002-yilning sentabrida O‘zbekiston xalq artisti Yoqub Ahmedovning Nodiraxon ismli qizi bilan oila qurgan.
Juftlikning Tojirahmon, Aslzoda, Mohizoda ismli bir o‘g‘il va ikki qizi bor.
Bahriddin Zuhriddinov
O‘zbekistonda xizmat ko‘rsatgan artist Hosila Rahimova qizi Mohibonuni xonanda Bahriddin Zuhriddinovga turmushga uzatgan.
“Ijodimda ham, biznes sohamda ham qaynonamning hech qanday dahli yo‘q. Hammasini oilamiz bilan qilganmiz. Qaynonamgacha bo‘lgan vaqtda ham Bahriddin Zuhriddinov bo‘lib tanilganman. Qaynonam maslahat berib turishi mumkin. Lekin hech qanday moddiy yordam berish, qo‘llab-quvvatlash bo‘lmagan. Ijod, biznes taraflama hech qanday daxli yo‘q. Hammasi o‘zimning mehnatim”, — deydi qo‘shiqchi.
2014-yilda nikoh qurgan juftlik bugungi kunda uch farzandning ota-onasidir.
Jahongir Teshaboyev
O‘zbekistonda xizmat ko‘rsatgan artist Xosiyat Husanova ham o‘z hamkasbini kuyov qilgan. U yolg‘iz qizi Mohlaroyimni yosh aktyor Jahongir Teshaboyevga turmushga bergan.
Jahongir “Qadam” serialidagi salbiy roli bilan tomoshabinlar e’tiboriga tushgan. Ularning bir yoshli o‘g‘illari bor.
Baxtiyor Yusupov
Ustoz san’atkorlar Shohida va Mahmud Ismoilov uch nafar qizidan birini aktyor Baxtiyor Yusupovga uzatgan.
Kuyov qaynona-qaynotasi bilan bir dargoh, o‘zbek milliy akademik drama teatrida faoliyat yuritadi.
Mirkamol Qoraboyev
24 yil avval efir yuzini ko‘rgan “Ko‘ngil ko‘chalari” serialidagi Suqsur roli bilan tomoshabinlar nazariga tushgan aktrisa Go‘zal Fayziyeva ham qizini kasbdoshiga uzatgan. Hozirda O‘zbek davlat drama teatrida ishlayotgan aktrisaning ikki o‘g‘il va bir qiz farzandi bor.
Aktrisaning bir qator film va seriallarda suratga tushishga ulgurgan qizi Yulduz O‘zbekiston xalq artisti Ozodbek Nazarbekovning “Mendirman” klipida Jaloliddin Manguberdi rolini ijro etgan yosh aktyor Mirkamol Qoraboyevga turmushga chiqqan.
Izoh (0)