Tug‘uruqdan keyingi depressiya kabi tushuncha haqida nisbatan yaqinda gapirila boshlandi. Ba’zilar bu tashxisni injiqlik deb atasa-da, shifokorlar tug‘uruqdan keyingi depressiya haqiqatan ham borligini va yangi onalarning 10—20 foizida sodir bo‘lishini aytadi. Quyida ushbu holatni boshdan kechirgan yulduzlar haqida ma’lumot beramiz.
Gvinet Peltrou
Aktrisa intervyularning birida o‘g‘li Mozes tug‘ilgandan keyin depressiyaga duch kelganini aytib o‘tdi. “Shifokor menga antidepressantlarni yozmoqchi edi va agar ular menga haqiqatan ham qo‘l kelsa, men ularni sotib olaman dedim. Bu vositalar, albatta, ko‘pchilikka yordam beradi, lekin men muqobil davolash usullarini izlashga qaror qildim”, – deydi aktrisa. Gvinetning so‘zlariga ko‘ra, sport bilan shug‘ullanish, spirtli ichimliklardan voz kechish va sog‘lom uyqu unga depressiv holatni yengishga yordam bergan.
El Makferson
2003-yilda Amerika shou-biznesi supermodel El Makfersonning ikkinchi merosxo‘ri Aurelius Say Andrea Busson tug‘ilgandan so‘ng darhol paydo bo‘lgan depressiyani yengish uchun klinikaga tushgani haqidagi xabardan hayratda qoldi. “Ma’lum bo‘ldiki, men bu holatga o‘zim dosh berolmayman. Mening tuzalib, o‘zimga kelishimga shifokorlar yordam berishdi”, – deb eslaydi model yillar o‘tib.
Adel
Nashrlardan biriga bergan intervyusida qo‘shiqchi Adel yana farzandli bo‘lishga shoshilmayotganini aytib o‘tdi, chunki u 2012-yilda o‘g‘li tug‘ilgandan keyin uzoq vaqt davomida depressiya bilan kurashdi. Yulduzning so‘zlariga ko‘ra, u antidepressantlarni qabul qilishni istamagan va his-tuyg‘ularini kimdir bilan muhokama qilishdan qo‘rqadi. “Depressiya paytida siz kimdir bilan gaplashasiz, lekin ular sizga nima deb javob berishlarini eshitmaysiz, chunki buning uchun kuch yo‘q‘, – dedi Adel. Xonandaning so‘zlariga ko‘ra, boshqa yosh onalar bilan muloqot unga qiyin davrdan yengilroq o‘tishga yordam bergan.
Bruk Shilds
Opra Uinfri shousida sobiq model va ikki qizning onasi Bruk Shilds kutilmagan ma’lumot bilan bo‘lishdi. Ma’lum bo‘lishicha, u birinchi farzandi tug‘ilgandan keyin depressiyaga duch kelgan. “Rouen doimo yig‘lardi va erim uni oldimga olib kelganida men qo‘rqa boshladim. Shu paytgacha men boshqa odamlarning bolalari bilan birga ekanidan xursand bo‘lardim, lekin qizimga nisbatan men buni his qilmadim”, – deydi model. U psixoterapiya tufayli hayotidagi qiyin davrni yengishga muvaffaq bo‘ldi.
Riz Uizerspun
Yaqinda aktrisa Jamila Jamilning podkastida mehmon bo‘ldi va u yerda tug‘uruqdan keyin jiddiy ruhiy muammolarga duch kelganini so‘zlab berdi. “Mening uchta farzandim bor, ularning har birining tug‘ilishi menga turlicha ta’sir qildi. Birinchi farzandim dunyoga kelganida menda deyarli hech qanday tashvish yo‘q edi, lekin ikkinchisidan keyin kuchli dorilarni qabul qilishga majbur bo‘ldim, chunki men o‘zimda emas edim”, – deydi Uizerspun. Aktrisa, shuningdek, tug‘uruqdan keyingi tushkunlik eng ko‘p e’tibor qaratish kerak bo‘lgan haqiqiy muammo ekanini ta’kidladi.
Izoh (0)