Украинанинг ғарбидаги Черновси шаҳри Мила Куниснинг туғилиб ўсган ватанидир. Шу сабабли у ерда ҳарбий низолар бошланганида Голливуд юлдузи Мила ва унинг турмуш ўртоғи Эштон Катчер вазиятга биринчилардан бўлиб муносабат билдирди. Албатта, сўздагина эмас, балки амалда ҳам.
Мила ва Эштон украиналиклар учун 30 миллион долларлик ёрдам йиғиш мақсадида Airbnb ва FlexPort.org’ни улаш орқали GoFundMe кампаниясини ишга туширди. Юлдузли жуфтлик инсонпарварлик ёрдами ўз вақтида ва керакли жойга етказилиши учун барча ҳисоб-китоб масалаларини ҳам ўз зиммасига олди.
«Украиналиклар жуда жасур ва кучли халқ. Аммо бу уларнинг ёрдамга муҳтож эмаслигини англатмайди. Илтимос, Украина халқи учун ёрдам пули йиғишда кўмак беринг», — дейди Мила Кунис эълон қилинган видеода.
Машҳурларнинг ўзлари хайрияга 3 миллион доллар қўшишга ваъда берди.
Эслатиб ўтамиз, Голливуд юлдузлари Райан Рейнолдс ва Блейк Лайвли украиналик қочоқлар учун миллион доллар хайрия қилди. Шунингдек, жаҳонга машҳур актриса Анжелина Жоли ҳам Украинадаги вазиятга муносабат билдириб, тинч аҳолига ёрдам беришини маълум қилганди. Актриса узоқ вақтдан бери БМТнинг яхши ният элчиси сифатида бутун дунё бўйлаб қочқинларни қўллаб-қувватлаб келади.
Изоҳ (0)