3-mart kuni poytaxtdagi muhtasham restoranlarning birida aktyor va rejissor Aziz Rametovning nikoh oqshomi bo‘lib o‘tdi. Bu yil 34 yoshni qarshilagan aktyor Shahloxon Umarova ismli qizga uylandi. Aktyor taklifiga ko‘ra “Daryo” internet nashri jamoasi to‘yga tashrif buyurdi va qiziqarli yulduzli to‘ydan reportaj tayyorladi.
Boshqa to‘ylardan farqli ravishda bu kecha hamkorlar ko‘magida o‘tkazildi. Hatto to‘y bilan bog‘liq ko‘rsatuv ham suratga olindi.
To‘yda o‘zbek teatrining mashhur aktrisalari bilan bir qatorda, kinoijodkorlar va qo‘shiqchilar ham ishtirok etishdi. Nazarimizda, bu to‘yda qaysi san’atkorlarning ishtirok etganidan ko‘ra, kimlar ishtirok etmaganini aytish osonroq bo‘lsa kerak. Chunki to‘y haqiqiy shou-dasturiga aylandi.
— Bu to‘yni Saida opa bilan uzoq vaqt kutdik. Saida Rametova qanchadan qancha to‘ylarni a’lo darajada o‘tkazgan, shu bois bugungi kecha ham fayzli o‘tmoqda. Toshkentda to‘rtta katta teatr bo‘lsa, barcha aktyorlar bugungi to‘yda jamuljam bo‘lishdi, — deydi aktrisa Xosiyat Husanova.To‘yni O‘zbekiston xalq artisti Farruh Zokirov ochib berdi. Undan keyin Shohruxxon, Mavluda Asalxo‘jayeva, Hosila Rahimova, Farhod Saidov, Shohrux reper va Muzaffar Abduazimov kabi san’atkorlar o‘z qo‘shiqlari bilan to‘yga yanada fayz bag‘ishlashdi.
— Aziz 34 yoshni qarshilab, biroz “o‘tirib” qolgandi. Xayriyatki, baxti ochilib, kuyovlik darajasiga erishdi. O‘z oilam nomidan Rametovlarni muborakbod etaman. Azizbek va kelinimizga baxt tilayman. Ilohim, beshik to‘ylarida ham ishtirok etish nasib etsin, — deydi qiziqchi Shukurullo Isroilov.
— Ustozimiz Saida opaning quvonchli kunlarida ishtirok etayotganimdan juda xursandman. To‘y haqiqatan ham fayzli o‘tdi. Saida opam qatori bu to‘yni butun O‘zbek milliy akademik drama teatri aktyorlari kutishdi. Azizbekka chin dildan baxt tilayman, — deydi aktrisa Dilnoza Kubayeva.
Odatda kelin-kuyovlar valsga tushishadi. Aziz Rametovning nikoh to‘yi ham kreativ yangiliklarga boy tarzda o‘tdi. Kelin-kuyovlar boshqalardek valsga yoki sokin musiqaga raqs tushishmadi. Balki Shohrux reperning qo‘shiqlariga hamohang tarzda harakatlanishdi.
Ko‘plab yoshlarning to‘yida “kelinsalom” aytib, muxlislar olqishini olgan aktrisa bugun qaynonalik maqomida bo‘lishiga qaramay, o‘z keliniga “kelinsalom” aytdi. Yulduzli kecha shu kabi kutilmagan voqealarga boy bo‘ldi.
Eslatib o‘tamiz, aktyor Shahlo Umarova bilan oila qurdi. U 1993-yil tavallud topgan va Nastarin collection brendiga asos solgan. Hunarmand qiz shu kungacha Ozoda Nursaidova, Zarina Nizomiddinova, Kaniza kabi shou-biznes vakillarining libos bezaklari bo‘yicha hamkorlik qilgan.
Izoh (0)