Shavkat Mirziyoyev talabalarning bandligini ta’minlash orqali ularning turmush darajasini oshirish yuzasidan videoselektor o‘tkazgani to‘g‘risida xabar berilgandi. Yig‘ilishda davlat rahbari bir oy muddat ichida talabalar yotoqxonasi masalasida o‘zgarish qilmagan hokim va OTM rektori ishdan olinishini ta’kidladi, deb xabar beradi uning matbuot kotibi Sherzod Asadov.
“2021-yilda talabalar yotoqxonasi bo‘yicha tizim yaratildi. Lekin, barcha hududlarda ham ishlar bir xilda olib borilmayapti”, — deydi davlat rahbari.
Ta’kidlanishicha, bugungi kunda ehtiyoji bo‘lgan talabalarning 90 ming nafari yotoqxona bilan ta’minlangan, xolos.
Misol uchun, 2022-yilda xususiy sherikchilik asosida 19 ming o‘rinli 47 ta talabalar yotoqxonasini qurish belgilangan bo‘lib, subsidiyalar uchun budjetdan 180 milliard so‘m ajratilgan. Bugungi kunda Andijon, Samarqand va Toshkent shahridan tashqari boshqa hududlarda ish boshlanmagani tanqid qilingan.
Shuningdek, ijarada yashayotgan talabalarga 2022-yilda byudjetdan 120 milliard so‘m subsidiyalar ajratilgan. Ya’ni rektorlarga o‘tgan ikki oyda 24 milliard so‘m mablag‘ berilgan. Biroq ushbu mablag‘lardan atigi 5 milliard so‘m ishlatilgan. “Bir oy ichida o‘zgarish qilmagan hudud rahbari va oliygoh rektori ishdan olinadi”, — dedi Shavkat Mirziyoyev.
Qaysi oliygoh rektori yotoqxona qurilishining 50 foizini o‘z oliygohi mablag‘i hisobidan qilish tashabbusini bildirsa, qolgan 50 foizi budjetdan qoplanishi belgilangan.
Avvalroq O‘zbekistondagi har bir OTM Oliy ta’lim vazirligi bilan birgalikda Bandlik markazlarini tashkil etishi, O‘zbekistonda OTMlarda pullik o‘quv kurslari, to‘garaklar tashkil etgan talabalar daromad solig‘idan ozod qilinishi, mamlakatdagi barcha davlat tashkilotlari va muassasalarida talabalarning ishlashiga ruxsat berilshi to‘g‘risida xabar berilgandi.
Izoh (0)